Sermimit erngup ajunaarneq annerulersippaa
Ilisimatusartoq: Sermersuup qaavani siku aattup ernga imaluunniit sermersuup iluanit imeq Kangerlussuarmi ajunaarneq annerulersippaa
Ulluni qaangiuttuni Kalaallit Nunaata Kitaani seqinnerluni kiannerata Kangerlussuarmi pinngortitap piliaanik ajunaarnermik kisimi aallartitsinngilaq.
Sermersuup qaavani ataaniluunniit sikup aattup imiliaa katersuussimasinnaasartup kuummi erngup superujussuarneranut patsisaaqataasinnaapput.
Taamak naliliivoq silap pissusaanik aamma issittumi ilisimatusartoq dr. Sebastian Mernild, Los Alamos National Laboratory, New Mexico, USA, taassuma misissuinerminit silap pissusaata paasissutissartai tigummiarpai:
- Takuneqarsinnaavoq ulluni qaangiuttuni silap kianneranit sermip aannera taamaallaat pisuutinneqarsinnaanngitsoq Kangerlussuarmi imermik annertuumik kuuttoqarneranut.
- Ilimanarpoq silap kiannera aammalu sermersuarmi sermip qaavani ataaniluunniit erngup katersuussimasup kuulerneratigut ataatsimoorlutik taamak annertutigisumik qarsutsinermik pilersitseqatigiinnerat. Taanna pinngortitami nammineq pilersarpoq ilisimatusartut akornanni taaguuteqarluni Jøkelløb, Sebastian Mernild nassiuiaavoq.
Sermimi imeqarfiit taamaattut juunimi juulimilu piulersarput, erngullu naqitsinera sakkortuallaaleraangat qaartarlutik tamatuma kingorna imeq koorujussuartarluni. Kisitsisileruminaappoq imeq qanoq annertutigisoq sermersuarmi piulersartoq kisianni annertoorujussuaq eqqartorparput, ilisimatusartoq oqarpoq.
Kalaallit Nunaanni taamak pisoqartarnera takornartaanngilaq, pissutsit taamaattut 1980'ikkunnili ilisimaneqarput.
- Maannakkut takusatsitut taamak ingasatsigineq ajoramik. Erngup katersuuffii qaaraangata sakkortunerusungasarput, Sebastian Mernild oqarpoq.
Silap pissusaanik issittumillu ilisimatusartoq naliliivoq pinngortitami taamak pisoqartarnera akulikinnerulerumaartoq sakkortunerulerlutillu silap kissatsikkiartornera ilutigalugu.
- Kissatsikkiartortillugu akulikilliartussapput, Sebastian Mernild oqarpoq.
Kalaallit Nunaanni piffissami matumani nalinginnarmiit kianneruvoq. Narsarsuarmi nunatta kujataani sapaatip akunnerata siuliani 23,6 gradinik kiattoq uuttorneqarpoq Nuummi 20,3 gradit.
Sermersuarmi uuttortaaviit qatsinnersaanni 3200 meterisut portutigisumi Summit, issatsiaq 2,2 gradinik kiattoq uuttortarneqarpoq.