Kangerlussuarmi pisut nakkutigineqarput
Namminersorlutik oqartussat aamma Mittarfeqarfiit oqaaseqaatigaat Kangerlussuarmi timmisartuussinermik ingerlatsineq innarlerneqassanngitsoq
Borgmester Herman Berthelsen, Qeqqata Kommunia aamma naalakkersuisup siulittaasuata paarlattaa Jens B. Frederiksen arfininngornermi atorfilittat aamma Mittarfeqarfiit pisortaanerat Jens Lauridsen peqatigiillutik arfininngornermi Kangerlussuarmi pissutsinik misissuipput.
Ilisimaneqarpoq suli kuuk imermik annertuumik aqqusaarneqartoq sermersuarmi pisarnermik ingasannermik sermip aanneranit aallaaveqartumik.
Ikaartarfik timmisartoqarfiup nunaqarfittaata kujataani inissisimasoq annertuumik aseruatitersimavoq ilaatigullu erngup aqqutaa aamma aserorsimalluni. Imali aseruatitersimasut ingasatsiginngitsut nunaqarfiup imermik innaallagissamillu pilersorneqarneranut akortaallutik, tusagassiivinnut allakkami erserpoq.
Namminersorlutik oqartussat aamma Mittarfeqarfiit ataatsimut oqaaseqaatigaat Kangerlussuarmik timmisartuussinernik ingerlatsineq aseruatitertunit akornuserneqarnavianngitsoq. Mittarfeqarfinniilli ajutoortoqarsinnaanera piareersimaffigineqarpoq, imermik innaallagissamillu pilersuisinnaaneq qulakkeerneqareersimalluni.
Kangerlussuup timmisartoqarfia Kalaallit Nunaanni angallannermi qitiulluinnarpoq pingaaruteqaqisoq taamaattumik illuatungeriit nuannaarutigeqaat timmisartoqarfik pisarnermisut toqqissisimasumik ingerlanneqarsinnaanera nunamut tamarmut iluaqqutaasoq.
Herman Berthelsen, Jens B. Frederiksen aamma nunaqarfimmi aqutsisut isumaqatigiissutigaat piffissaq qaninnerusoq eqqarsaatigalugu namminersorlutik oqartussat aamma Mittarfeqarfiit pilersuinermik qulakkeerinissaat, soorlu piffissaq ungasinnerusoq isigalugu pilersuinermik ledningit qulakkeerneqarnissaasa isumaginissaat.
Aamma isumaqatigiissutigineqarpoq Qeqqata Kommuniata nunaqarfiup kujasissortaani ikaartarfiup ulluni qaninnerpaani atorneqarsinnaanngorluni iluarsaanneqarnissaa.
Erngup qaffasissusaa pissusissamisut ileqqippat Qeqqata Kommunianit iluarsaanneqarnissaanut misissuinerit siulliit nalilersuinerlu ingerlanneqassapput ikaartarfimmik siunissamut qulakkeerinnissutaasussat aamma silap pissusaata allanngorneranut eqqarsaatigineqartariaqartut isumagineqassallutik.
Qeqqata Kommunea namminersorlutik oqartussat ikiorsiullugit siunissami taamak pisoqaqqissinnaaneranut iliuusissanik pilersaarusiortoqassaaq.
Namminersorlutik oqartussat aamma Qeqqata Kommunia suleqatigiillutik suliassat isumagissagaat tusagassiivinnut nalunaarummi erserpoq.