Angerlamut aqqut utaqqinartulik

- Kinguaattuulerpugut Kangerlussuarmit aallarnissarput nal. 14.10 naatsorsuutigaarput, Sisimiunit ilaasussat utaqqigatsigit.

Tallimanngormat ullup qeqqaraa Kangerlussuarmi airbussimi ata anersaarpalunnguarsi. Airbussimi aquttup højtalerikkut nalunaarutigimmagu sooq Danmarkimut timmisartoq piffissaq eqqorlugu aallarsinnaanngitsoq anersaammerpalaaq ima sakkortutigaaq timmisartoq nammineq qangattangajattuinnaavoq. Nal. 11.40 aallartussaagaluarpugut. Nalunaaqquttap 11.40 qangali qaangerujussuareerpaa.

- 14.10! Ilumoorsinnaanngilaq inuit imminnut qiviarlutik upperinnippasigatik oqartullu aquttup iluarsivaa:

- Soorunami nal. 14.10'unngilaq. Sisimiuni timmisartup nal. 12.10 tikinnissaa naatsorsuutigaarput.

- Soorunami, ilaasut ilaat imminut pivoq:

- Kisiannimi taava kuffertit aamma issoraanneqaqqaassapput. Nal. 12.30 aallassaagut.

Qarasarsupallannerup kingorna paasinarpoq minutsinik 50'inik kinguaattuussasugut. Inuit issimasut Jyllandimut qimuttuitsumik angumeqqunnissartik ilimagisinnaajunnaareerpaat aamma SAS timmisartua - Kastrupimit Aalborgimut timmisussaq kingulleq nal. 21.30 miss. aallassaaq. Angumerineqarsinnaanerluni.

Sanilima nalunaaqutamini kisitsivoq:

- Taava piffissap assigiinngissutaa ilanngukkuni. Ajornakusuulissaaq kiinaani qungujulanera mitaarninnguukkiartorpoq.

Uanga nammineq suli neriuppunga Jyllandimut qimuttuitsoq kingulleq nal. 21.36 angumerisinnaassallugu. Sukkasuumik iluatsitsilluarlungalu nassatakka tigupallassinnaagukkit ajornavianngilaq.

Nal. 12.30 timmisartup assakaasuisa Kangerlussuaq qimappaat, timmisartorsuaq minutsinik 50'inik kinguaattoorluni.

Nerisassinneqarpugut, kiffartuunneqarluta, filmi isiginnaarneqarpoq, issiavimmi eqqissiveqarani issiasoqarpoq Danmarkip qanilliartornera utaqqillugu.

Aallakaatinneqartartoq timmisartup aqqutaani takuneqarsinnaasartoq ajortissimavoq, taamaattumik eqqissiivilluni issialluni eqqarsaatikkut uisakuluutinngorpoq Danmarkimut angalanerup angallannermi aaqqissuussinermik allanngortitsisariaqartiginera. Imminut aperivunga ilaasut qassit feriarniarlutik angalanissaminnut ilungersornikut - imaluunniit Kalaallit Nunaat qimallugu angalasut ilungersuatinneqassappat Sisimiunit ilaasussat marlussuit kinguaattoornerat pisutigalugu.

Maannakkut imminut oqarfiginissamut piffissanngorpa "soorunami kikkut tamarmik ilaassapput allatut iliorsinnaanngilagut". Imaluunniit sermersuartulli nillertigaluni oqartoqassava: "Uanga angalaneq una akilereerpara minnerpaamik piumasaqaatigisariaqarpara piffissaq eqqorlugu aallarnissara."Pingaartumik aasakkut angalanermi. Ilami anorersuarnera allatulluunniit ajornartorsiorneq pissutigalugu kinguaattoortoqanngilaq. Allatut oqaatigalugu meeqqatut porranneruvoq.

Illuatungaani annakkuummernarpoq neriuutissaqarnaqalunilu airbussi Kastrupimi timmisartoqarfimmi niuffissap tungaanut ingerlarusaalermat. Nalunaaqutaq 21.00 - Jyllandimut qimuttuitsoq angumerineqarsinnaasariaqarpoq. Peqqissaasoq Tingleviliartussaq angumersiniarluni uisajunnaarpoq. Taanna isumaqarpoq qimuttuitsunut billitsissani annaareerlugu oqaatigaalu, Københavnimi hotelit arlaanni sininnissaminut aningaasartuuteqartariaqarluni arfininngornermilu ingerlaqqiinnartariaqarluni. Ugguarpoq. Saninni issiasoq ernumavoq, siullermik kuffertini tigoriarlugu nunap iluani timmisartuussut timmisartoqarfiannukartussaavoq ingerlaqqitsigani. Ajornartorsiutini timmisartumi saqisumut oqaatigaa taassuma akivaa, tamanna nammineq qanoq iliuuseqarfigerpiarsinnaanagu. Tuinik qaffattarpai, qungujunnera qeratavoq.

Nassatanik tigooraasarfimmut tuaviinnaq ingerlanerup nalaani iluatsitsinissamik neriuut kingumut takkuppoq. Paasissutissat tavlianni "3 min" takuneqarsinnaavoq - inerujussuarmi båndip kuffertinik kaavititsisup qulaani qullermi takuneqarsinnaavoq. Inuit kuffertinik tigooraavik imaqanngitsoq kaajallassimavaat. Putoq kuffertit nuiffigisassaat sivisuumik isigigaanni taamaalluni puttuttoqassaqqooqaaq. Isilli kuffertinik takusassaqanngillat.

Minutsit 15'it qaangiuttut suli susoqanngilaq. Inuit naammagittaapput, kiappoq kiaguttoqarpoq - aap, isuma kingumut pitsaajunnaarpoq. Aamma allagartaq qamippoq. Jyllandimut qimuttuitsup nal. 21.36 aallarnissaa qalliartuaaq, nassatat kaaverusaartarfiat suli imaqanngilaq. Minutsit 45't qaangiummata kuffertit qulit missaannik nuipput. Angalasut arfinillit iluatsitsipput ingerlallutillu. Allat tamarmik nikorfapput qilak kisiat isigalugu.

Nal. 22.10 kiisami nassatat takkussuutilerput. Qanga qujanaannannguarsi, ilami qasuneq, isumalunneq aammalu Air Greenlandip aviisikumik masattumik niaquagut anaalernissaannik kissaat tammartutullusooq ippoq, kuffertip takusap annakkuummernarneranit. Uagut tamatta Jyllandiliartussat nassatagut kalillugit hotelialianngikkutta qimuttuitsup unittarfiliaavugut, Jyllandimut aqqut kingulleq nal. 23.05 angumeriniarlugu. Uanga angerlarsingaarama arfininngornikkut ullaassakkut nal. 02.30 apuuppunga.

"7 procentit Jyllandimut ingerlaqqittarput", Air Greenland aviisimut Sermitsiamut nassuiaavoq allaaserisami allami "Vi er alle jyder for Vorherre". Allaaserisaq taanna Air Greenlandimit illuartiinnarneqarpoq ajortussarsiuinnarluni oqalunnerinnartut nalilerneqarluni. Imminut aperisoqarsinnaavoq Air Greenlandiluunniit aperineqarsinnaavoq, Air Greenlandip kitsitsit 7 procent sumit pissarsiarineraa? Kinaluunniit inuk Kastrupip timmisartoqarfianeerusaarnissaminik soqutigisaqanngilaq tassaniittussaatinnani. Kikkut tamarmik ingerlaqqittussaapput. Soorunami aamma ingerlaqqittarput, naammaginanngilarli inuit taamak amerlatigisut hotelimut assigisaannullu amerlanernik aningaasartuuteqassappata, pissutigalugu Kalaallit Nunaanni kigaalaartoqarnera pissutsit inunnit nalinginnarnit paasineqarsinnaanngitsut pissutigalugit - taava arlaannik ajortoqarpoq.