Lars-Emil: Puisimik suliaq taamaatiinnarneqarpoq
Lars-Emil Johansen naapertorlugu Puisimik suliami taasami ajugaanissaq namminersorlutik oqartussanit taamaatiinnarneqarpoq
Lars-Emil Johansen ullumi ilisimatinneqarpoq, Puisimik suliamik taasami ajugaanissamik eqqarsaat namminersorlutik oqartussanit taamaatiinnarneqartoq.
Lars-Emil Johansen Sermitsiaq.AG-mut taama oqarpoq.
Lars-Emil Johansen Puisi A/S-imut siulersuisunut siulittaasuusimavoq siornalu suliami pinngitsuutinneqarluni.
Tamatuma kingorna eqqartuussut namminersorlutik oqartussanit nangitassanngortinneqarpoq, taamaakkaluartorli Lars-Emil Johansen naapertorlugu suliaq namminersorlutik oqartussanit maanna taamaatiinnarneqarpoq.
- Ilimagaara ajugaanissaminngarnit ajorsarnissartik ilimanaateqarnerusoq paasisimagaat, oqarpoq, namminersornerullutillu oqartussat aalajangernerat tupaallaatiginnginnerarlugu.
Læs "Puisi-sag: Alle blev frifundet"
Taamaakkaluartoq Lars-Emil Johansenimut tamanna oqiliallaataasorujussuuvoq.
- Soorunami uannut ilaquttannullu oqiliallaataasorujussuuvoq. Tassami piareersarluarsimagaluarlungalu ukiunilu 40-ni politikerioreerlunga imaaliallaannaq uppisinneqarsinnaanngikkaluarlunga pisumit sunnersimaneqarsimavunga. Kisianni ingammik ilaquttakka sinnerlugit nuannaarpunga, oqarpoq.
- Aamma naalakkersuisut eqqortumik aalajangiisimarnerannik pilluaqqorusuppakka.
Sermitsiaq.AG namminersorlutik oqartussat attaveqaraluarpoq, sulialli taamaatiinnarneqarsimanerata pisortatigoortumik uppernarsarneqarnissaa utaqqimaarallarniarlugu.