- Naalakkersuisut demokratii pingaartinngilaat

Ilinniartitsisut kattuffiata IMAK siulersuisui naalakkersuisunut allakkakkut ammasukkut sakkortuumik isornartorsiuipput. Allagaq tamakkiisoq uani atuaruk

Naalakkersuisunut allakkat ammasut.

Oqaatsit demokrati, atuisutut oqaasissaaqataaneq isumaqatigiissutigisimasat inissisimaffiillu tunngavigalugit ataqqeqatigiinneq, uppernassuseq il.il. oqaasiupput Naalakkersuisut tunulliuteqqajaasagaat.

2012-imi apriilip 20.-ata 21.-atalu akornata unnukkuani Naalakkersuisut IMAK-illu 2010-mi isumaqatigiissutissaat inaarutaanik kiisami atsioqatigiipput.

Tamanna atsioqatigiinneq pivoq isumaqatigiissutip atuuttilernissaagalua ukiunik marlungajannik qaangeraalu.

Nunatsinni inuiaqatigiit tamarmik ilisimavaat, Namminersornermi Oqartussani pissutsit peqqutaallutik isumaqatigiinniarnerit aatsaat januaarimi 2011-mi aallartinneqarmata, tassa aallartiffissaagaluaniit ukioq ataaseq qaangiuttorlu.

Taamaammat isumaqarnarsinnaagaluarpoq Namminersorlutik Oqartussat isumaqatigiinniartussaat piareersarnissamut piffissaqarluaraluartut, minnerunngitsumik isumaqatigiissutissat ataqatigiinnilersornissaanut, assersuutigalugu fagdepartementep suliniutaanut tunngasunik. Uani taassallugu pingaaruteqarpoq isumaqatigiinniarnerup ingerlanera tamakkerlugu fagdepartementi KANUKOKA-lu peqataasarmata.

Kiisalu isumaqarnarsinnaagaluarpoq piareersarluarsimaneq peqqutigerpiarlugu sulisitsisut inaarutaasumik ataanni allassimasussatut immikkoortoq piumasarigaat:

”Isumaqatigiinniartut illugiillutik isumaqatigiissutigaat, meeqqat atuarfiani aqutsineq nukittorsarneqassasoq. Taamaammat suleqatigiissitaliortoqassaaq, tassunga tunngasumik misissuisussamik aqutsisullu nukittorsarnissaannut tunngasunik siunnersuusiliortussamik, soorlu makkununnga tunngasut ilinniaqqittarneq, aqutsinermut tunngasut iliuusissat meeqqallu atuarfiata aaqqissuulluarnissaa pillugit.”

Misissueqqissaarnissaq soorunami IMAK-ip peqataaffigerusutaa Naalakkersuisullu apriilimi 2012-mi piumasarisaasussatut oqaatigisaat.

Qanorli pisoqarpa – Naalakkersuisut isumaqatigiinniummut akuersisutut naatsorsuutiginiarlugit qaammataanngitsorluunniit qaangiuttorlu, suleqatigiissitaliassarluunniit suli pilersinneqanngitsoq, Ilinniartitaanermut Ilisimatusarnermullu Departementi siunnersuummik meeqqat atuarfiata inatsisissaanik tusarniaassutissamik nassiussivoq. Inatsisissatut siunnersuut suleqatigiissitaliassap misissoqqissaagassaanut tunngalluinnartoq.

Maajip aallartinneraniit Naalakkersuisut isumaqatigiissutip inaarutaasumik akuersineraniit, juunip 5.-ata 2012-ip inatsisissamik siunnersuummik nassiussinerup tungaanut, misissueqqissaarnissamik sulinissaq pisariaarunnerami?

Isumaqatigiinniarnerit ingerlanerini IMAK-ip arlaleriarluni malugisarpaa, Naalakkersuisut siornatigut isumaqatigiinniartarnerni ileqqorissaarneq atortagartik atorumarpianngikkaat, taarsiulluguli IMAK-i ersisaarniartutut iliuuseqarfigalugu akuersitinniaraa, inatsisiliornikkut ajornerusunik angusaqarnissaanik siorasaarlugu.

Taama ajortigisumik Naalakkersuisut ingerlassilernissaat isumaqarfiginngisaannarsimagaluarparput, tassami Naalakkersuisut isumaqatigiinniarnerni namminneerlutik akuerisatik innimiginngivillugit iliornerat siornatigut pisinnaasutut takorloorsimanngisaannaraluaratsigu.

Naalakkersuisummi meeqqat atuarfiat qanoq ittoq pigilissallugu takorloorpaat, qasseeriaqalutik ilinniartitsisunik nikanarsaatinik iliuuseqartarunik, Naalakkersuisut meeqqat atuarfiata soqutigisai tusaanianngikkunikkit, Naalakkersuisullu qaammatip ataatsip iluani - namminneq akuerisartik – ilinniartitsisunit isumaqatigiissut isumaqatigiissutaammat akuerineqartoq atorunnaarsikkunikku.

Naalakkersuisut nalunngisaat tamatigut pitsaanerpaasarsimagunarput, aningaasat qanoq amerlatigisut atussanerlugit kisiat tunngavigalugu sulinissartik qinertarunikku, ilisimatusarnikkut nunarsuarmi tamarmi ilinniarnermut tunngasut paasisat qivianngiivillugit meeqqallu atuarfiata soqutigisai suleqatiginnissutiginngiivillugit iliorlutik.

Naalakkersuisunuku oqaatsinik killilersugaanngitsumik isumaqatiginninniarneq, uppernassuseq, suleqatigiinneq demokratilu, nunani demokrati malillugu ingerlasuni isumaqartinneqarnerinit allatut nassuiartarsimagunaraat.

Naalakkersuisut aporaattuarneq piumanerusimagunarpaat suleqatigiinnerminngaanniit.

Naalakkersuisut piffissaq nukiillu akerleriiffinnut atorusunnerusimagunarpaat, meeqqat atuarfiata iluaqutissaanik suleqatigiinnissaagaluaq tunulliullugu.

Taamaattoqarnera nunatsinni meeqqat atuarfiani atuartunut tamanut, nunatsinnimi inuiaqatigiinnut tamanut demokratimillu paasinnittarnermut tamarmut ajuusaarnarluinnarpoq.

Taamaammat IMAK-ip Naalakkersuisut sakkortuumik kajumissaarpai tusarniaanerup ingerlanera unitseqqullugu, suleqatigiissitaliamik pilersitseqqullugu kiisalu misissoqqissaagassat pisariaqartut isumaqatigiinniarnermi isumaqatigiissutit malillugit ingerlateqqullugit.

Naalakkersuisulli neriugisaagaluaq pinnagu akerlianik iliussappata, taava IMAK-ip ajoraluartumik Naalakkersuisut tatigisariaqanngitsutut naatsorsuuttariaqalissallugit taamatullu iliuuseqartariaqalissalluni paasissavaa, Naalakkersuisunillu isumaqatigiissuteqarneq malinneqarnavianngitsutut naatsorsuutigineqassasoq – Taamaalillunilu demokrati malillugu ingerlatsineq ajorsarpoq.

Inussiarnersumik

IMAK-ip siulersuisui

juunip 9.-a 2012