Nive Qaanaaq aamma Pituffik tikippai
Nive Nielsen & The Deer Children piffissami kingullermi Qaanaami Pituffimmilu tusarnaartitsipput
Kalaallit Nunaanni nipilersornerup silarsuaani tusaamasaanerpaat ilaat Nive Nielsen & The Deer Children, tusarnaartitsiartorlutik nalinginnaangitsumik ornitaqarput.
Kalaallit Nunaata avannarpiaani Thule Air Basemi tusarnaartitsiartorlutik angalagamik inuiattut ullorsioratta aamma amerikamiut inuiattut ullorsiorneranni juulip sisamaanni sakkutooqarfiup Café Cool'iani tusarnaartitsipput.
Taakkua saniatigut Qaanaami tusarnaartitsipput tamaani meeqqanut tusarnaartitsineq tusarnaartitsinerlu nalinginnaasut ingerlanneqarput.
Qaanaami tusarnaartitsinerit nuannernerpaajupput, nipilersoqatigiinnit oqartoqarpoq.
- Qaanaamiinneq misigisaavoq nuannerluinnartoq aamma inuppassuarnik naapitsivugut tamakku assiliseqatigaakut ilassiorlugillu nuannaaqaallu, Jan de Vroede Sermitsiaq.AG'mut oqarpoq.
Thule Air Basemi misigisat allarluinnaapput:
- Thule Air Basemi ilaatigut eqqumiilliornalaarpoq ilami Kalaallit Nunaannik ilisimasatsinnit allaaneroqaaq, kisianni inuit maani inussiarnersorsuupput aamma amerikamiut, taakkua kalaallit nipilersugaannik soqutiginnittorujussuupput, Jan de Vroede oqarpoq.
Taassuma aamma Nive Nielsenip suliassaasa tulliat tassa A Circumpolar Soundscape, taakkua marluk erinarsortartut pingasut Nunavimmit, Nunavummit aamma Yokon'imeersunik suleqateqarnissaat.
Tassaapput Leela Gilday, Diyet aamma Sylvia Cloutier – taakkua suleqatigiinnissaasa inernissaat nunatsinni misigineqarsinnaapput Nipiaa Rock Festivalimi Aasianni aamma Nuuk Festival.