Saliigit 500'nik akissarsitinneqassaatit taava

Kikkut tamat eqqagassaminnik nassarusuttanngillat. Pinngortitami mingutsitsisut salitassaataat akileraartarutinit akilerneqaraangata naleqartaqaaq.

Taamaattumik Qeqqata Kommuniata innuttaasut saleeqataannissaat innersuutigaa. Tamanna kommunip nittartagaatigut ingerlavoq.

- Pinngortitaq innuttaaqatillu kiffartuukkusukkit 500 koruuninnagit.

Kissaatigaajuk:
• Pinngortitaq innuttaaqatitillu kiffartuukkusullugit?
• Orsussamut 500 koruuninik tapiiffigitillutit kangerlunni angalassallutit?

Sisimiut, Kangerlussuup, Sarfannguit Itillillu eqqaani sinerissap ingerlaarfiini, tupeqarfinni, kuunni eqaloqarfinni imaluunniit pinngortitami eqqakkanik katersillutit takujuminarsaaqataagit. Orsussamut 500 koruuninik tapiinissamik kommuni neqerooruteqarpoq.

Qaqqani ikuallattuunnginnissamut tunngatillugu 100 procentimik isumannaatsuuppat, sumiiffimmi eqqagassat ikuallassinnasut ikuallanneqarsinnaapput imaluunniit Sisimiunukaanneqarsinnaapput/nunaqarfiliaanneqarsinnaapput. Savimerngit allallu ikuallassinnaanngitsut Sisimiunukaanneqassapput ikuallaavimmilu tigoraavimmut tunniunneqarlutik imaluunniit nunaqarfinnukaallugit kommunip sulisuinut tunniullugit.

500 koruuninik pissarsiniarlutit uku assilissavatit:

• Immikkoortup takujuminarsannginnerani takujuminarsareerneratalu kingorna.
• Eqqagassat katersorsimasatit imaluunniit puussiarsuit ulikkaakkatit.

Teknikkimut Avatangiisinullu immikkoortortamut iserlutit nalunaarit imaluunniit ugguuna: qeqqata@qeqqata.gl / lokr@qeqqata.gl imaluunniit oqarasuaat 867460 atorlugu nunaminertamik takujuminarsarniakkannik isumaqatigiinniarlutit attavigisigut. Nunaqarfinni nunaqarfimmi allaffik attavigisinnaavat, nunaminertamillu takujuminarsagassannillu isumaqatigiissuteqarlutit. Atippit ammalu nunaminertap takujuminarsarniakkat paasissutissiissutiginissaa eqqaamallugu.

Kisianni tuaviortariaqarputit. Aaqqissuussineq inunnut/suleqatigiinnut 40-nut siullernut nalunaartunut tamaallaat atuuppoq.