Sisorartartut ivikkani sisorarput

Timersullammaat, nalinginnaasumik apummi sisorartartut, Estlandimi OL-imut sungiusaqataapput

Saamerlerniit Nuunu Berthelsen, Miillaaraq Lennert aamma Niviaq Berthelsen, Estlandimi OL-imut sungiusarnermi peqataasut. Ass.: Elitesport.gl

Miillaaraq Lennert, Nuunu Berthelsen aamma Niviaq Berthelsen, sisorallammattut ilisimasavut Estlandimi sungiusaqqammerput, tassani Øystein Slettemark aqutsisutut peqataalluni.

Sungiusarneq aaqqissuunneqarsimasoq Internationale Olympiske komite-mit (IOC) aamma Internationale Biathlon Union-imit (IBU) Estlandimi Haanja-mi ingerlanneqartoq ullunik qulingiluanik sivisussuseqarpoq.

Rulleski arpannerlu ulluinnarni sungiusarnermi atorneqarnersaapput peqataasullu aamma parrunneq misilippaat. Sungiusarnerit akornini ooqattaasarnermik sungiusartoqarlunilu sungiusarnerup pilersaarusiornissaanut pikkorissartitsisoqarpoq. Ooqattaasarnermik sungiusarneq illoqarfimmi ooqattaasartarfimmi ingerlanneqarpoq, imaluunniit Estlands Rigsanlæg for langrend og skiskydning-imi, tassanissaaq rulle ski-nut baneqarluni pitsassuarmik.

- Miillaaraq Lennert sisoraatinik oqilaniutiitigaluni ooqattaasarnermit uninngasimavoq, ooqattaasarfimmili sungiusarnerup takutippaa suli ooqattaasarneq sapinngikkaa. Niviaq Berthelsenip ooqattaasarneq siusinnerusukkut misililaartarsimavaa, Nuunu-llu aatsaaat misilillugu. Laser-imik aallaariartarnerit eqqortumillu aallaariartarnerit takutippaat arnat taakku marluk eqquisinnaalluartut. Sungiusarneq sammilluarunikku sisoraatinik oqilaniutiitigaluni ooqattaasarnermut ilimanaateqarluarput, Øystein Slettemark oqaluttuarpoq.

Miillaaraq Lennert ooqattaasarnermi angusarissaarpoq, timikkullu nukittussuseq eqqarsaatigalugu Niviaq Berthelsenip sungiusarnini paarisimavaa. Rulleski-nik banemi 3000 meterimut unamminermi sukkanerpaalluni 11,12 minutsit atorpai, Niviarlu Nuunu peqatigalugu sisoraatinik oqalaniutiitigaluni ooqattaasarmat parrunnermi taakkua sukkanersaapput.

- Sungiusarnermi tamatumani Kalaallit Nunaata peqataasinnaanera nuannaarutigisorujussuuvarput. Tamanna nutaamik piumassuseqalersitsivoq nutaarpassuarnillu piginnaasaqalersitsilluni, Øystein Slettemark oqarpoq.

Powered by Labrador CMS