Clipper Adventurer Kalaallit Nunaanni
Clipper Adventurer, Qeqertarsuup Tunuanik kaajallaanialuppoq Sisimiut, Qeqertarsuaq, Uummannaq, Niaqornat, Eqip Sermia, Ilulissat aamma Sarfannguit aqqusaarniarneqarput Tartupalummut ingerlaneqqinnginnerup siorna
Danskit angalatitseqatigiivat Albatros-Travel ukioq manna aammaarluni umiarsuaq takornariartaat nutaaq Clipper Adventure Kalaallit Nunaanni angalaartissallugu aallartippaa, angallat Nuummut aqqusaarpoq.
Umiarsuarmut ilaasut siulliit Københavnimit ataasinngorneq juunip aqqarngat aallarput, Shetlandip qeqertai, Savalimmiut aamma Island tikeraariarlugit umiarsuup Kap Farvel uiarpaa, pilersaarutigineqarluni Qaqortup kangerluani aamma illoqarfianik takornariarnissaq, tamannali iluatsinngilaq sikorsuaqarpallaarnera pissutigalugu, taamaammat Clipper Adventure Arsuup kangerluanut aamma Kangilinnguani sakkutooqarfik tikippaat, Nuummut ingerlaqqinnginnerminni.
Tassannga Kangerlussuatsiaq aamma Kangerlussuaq aqqusaarneqassapput. Ilaasut Danmarkimit aallaqataasut Kangerlussuarmi allanik taarserneqassapput, tamatuma kingorna Clipper Adventure sapaatip akunneranik sivisussusilimmi Qeqertarsuup Tunuani angalassaaq Sisimiut, Qeqertarsuaq, Uummannaq, Niaqornat, Eqip Sermia, Ilulissat aamma Sarfannguit aqqusaassallugit.
Qeqertarsuup Tunuani angalanissaq ukioq manna pingasoriarluni ingerlanneqassaaq, tamatuma kingorna juulimi sapaatip akunnerit kingulliit marluk takornariartaassuaq ileqqorilikkani naapertorlugu avannamut angalassaaq. Avannamut angalanermi siunertarineqarpoq Tartupaluup angunissaa, sikut ajornartorsiutaanngippata, Siorapaluk, Qaanaaq, Thule, Kullorsuaq aamma Upernavik aqqusaarneqassapput taakkulu aqqusaarneqaqqissallutik Qeqertarsuup Tunuani angalaarnerni. Clipper Adventurip Issittumi angalanini nangissavai, Nunavummi nunap immikkoortortaani canadamiut ilaasussat umiarsuarmut ikissapput.
Clipper Adventurimi ilaassaaq Axel Fiedler, siornatigut Kangilinnguani sakkutooqarfimmi pisortaasimasoq, umiarsuit nakkutilliinermik immikkoortortaani nunatta imartaani angalasuni. Soraarninngornermi kingorna angalanermik ilisimasassarsiornernillu Albatrosimi suliaqarpoq. Axel Fiedlerip arlaleriarluni Tartupaluk tikittarpaa sakkutuutut umiartortutut kingusinnerusukkulllu Albatrosimi ilisimasassarsiortitsinerni aquttutut.
- Ukioq 2012 Kalaallit Nunaanni angalanissat tamangajammik tunineqareerput, Albatros Travel'imi tusagassiinermik pisortaq oqaluttuarpoq nangilluni:
- Kalaallit Nunaanni takunneqqinnissarput qilanaaraarput aamma sineriammi illoqarfinni nunaqarfinnilu arnat, angutit meeqqallu suleqatigeqqinnissaat takoqqinnissaallu qilanaaraarput, taakkua pissutaallutik umiarsuarni takornariartut Kalaallit Nunaanni kalaallinillu naapitsinerminni annertuumik misigisaqartarput.
Albatrosip umiarsuaataa nutaajunerpaaq tassaavoq Clipper Adventure. Taanna 1975 sananeqarpoq Fredericiami 1998 annertuumik iluarsaanneqarluni. Albatros Travel umiarsuaq 2011 pisiaraa. Siornatigut Albatros Travelip Kalaallit Nunaannut angalatitsigaangami Ocean Nova atortarpaa. Ocean Nova siornatigut Arctic Umiaq Linep sinersortaatigaa, tallineqanngitsoq kisianni tungujortumik qalipannqeartoq takornariartitsinissamullu piukkunnarsagaasoq.
- Ilisimasassarsiortunut umiarsuatsialaavoq iluani soorlu qanga imarpissuarnik ikaartaatinut assingulluni. Kannissannik sanaat qisuillu taartut ineeqqani tamallu katersuuffigisinnaasaanni ersipput. Umiarsuaq nutaaliaanerpaamik sumiissusersiuteqarpoq, stabilisatoreqarluni aamma portusuumik sikunut illersuutitaqarluni. Umiarsuup iluaniipput gummibådit arlallit, zodiacsit, taamaasilluni ilaasut nunamut nunaqarfinnullu ikaanneqarsinnaapput. Umiarsuup silataani 61'inik ineeraqarpoq tamarmik uffarfillit perusuersartarfillillu, Axel Fiedler paasissutissiivoq.
- Clipper Adventurer Kalaallit Nunaanni aamma Canadami ukiut kingulliit arlaleriarluni angalasareerpoq, ilaatigut Albatrosip angalatitsinerani. Uanga Kap Alexander tikillugu aamma tunumi angalaqataanikuuvunga, Axel Fiedler oqarpoq.