Nunavummut aqqut aatsitassarsiortunut iluaqut
Air Greenlandip neriuutigaa aasaanerani Iqalunni aqqutip siammartinneqarnissaa. Kisianni aqqutissaq pitsaasoq ukiup ataatsip iluani pilersinneqarsinnaanngilaq, Michael Binzer tikkuaavoq
Nuannaarneq neriunnerlu - aammami tulluussimaalaarneq malunnarpoq Air Greenlandip pisortaanerata Michael Binzerip tallimanngornermi Nuup Timmisartoqarfiani Nunavimmi Iqalunnut timmisartortussat angalalluarnissaannik kissaammagit.
Ilaasunut akuuvoq Sermitsiaq.AG aamma GAp pisortaanera Brian Buus Pedersen, allanik angalaqateqarluni Air Greenlandip Canadamut timmisartorngaarnissaa iluatsillugu Iqaluit kujataanni St. John'imut aatsitassat pillugit ataatsimeersuarialersoq.
Aasaanerani timmisartuussisarneq tassarpiaavoq aatsitassarsiornermik ingerlatsisunut sammisinnerullugu aallartinneqartoq.
- Aasaanerani timmisartuussisarneq uuliamik aatsitassanillu sulialinnut aaqqissuussaavoq taakkua ullup ataatsip ingerlanerani innuttaminnik taarsiinissamut piariaqartitsisarput. Aqqutip pitsaaqqutigaa Nuummit Ottawamut Torontomulluunniit nal. ak. arfinillit atorlugit anngussinnaanerit. Tamanna suliffeqafinnut pingaaruteqartorujussuuvoq, uuliamik aatsitassamilluunniit suliallit angalallutik akkordimilluunniit sulisinneri akisoorujussuummat, Michael Binzer erseqqissaavoq.
- Aqqut una inuinnarnut naleqqussakkatut isiginngilara. Kisianni soorunami inuinnaat angalanerminni atussagaat takorusunnarpoq kisianni tassa aqqut taanna inuussutissarsiortunut pilersinneqarpoq.
- Aqqut nutaaq marloqiusamik isigaara aappaatigut ingerlariarfissatut aammali attartukkatut. Ukiut ingerlanerini Kalaallit Nunaata aamma Canadap akornanni timmisartut attartukkat atorlugit timmisartuussinerit arlalippassuit ingerlanneqartarput, aqqummik aalajangersimasumik neqerooruteqartoqannginnerata nalaani. Neriuppunga aqqut taanna kajumigineqarluni atorluarneqassasoq, Binzer nassuiaavoq ukiut qulit Kalaallit Nunaata Canadallu akornanni timmisartumik toqqaannartumik ingerlaartoqarneq ajorpoq maannali periarfissaq taanna neqeroorutigineqalerpoq.
Iqaluinnit ingerlaannaq allamut ingerlaqqittoqarsinnaavoq
- Aqqummi tassani suut killiliissangatippigit?
- Iqaluit inunnit ikittuinnarnit ornikkumaneqartarpoq. Taamaattumik First Air suleqatigiinnissamik isumaqatigiissuteqarfigaarput (canadamiut timmisartuutileqatigiiffiat ullut tamaasa Iqalunnit Ottawamut jetimik timmisartuussisartoq aaq.), inuit tassanga ingerlaannartumik allamut ingerlaqqittarsinnaannerat pillugu. Aqqut Nuuk-Iqaluit ikittuinnarnit piumaneqartarpoq.
- Qaqugu Air Greenlandimit paasineqassava piffissap timmisartuussiviup sivitsorneqarsinnaanera?
- Timmisartuussinissaq una piffissaq sivikitsoq aallarnerlugu timmisartumik mikisumik atorluta ingerlatissavarput (Dash 8 aaqq.) eqqissiivilluta ukiuni tullerni marlunni tuniniaavik allisikkiartussavarput. Neriuppunga aappaagu aasakkut ukioq manna sapaatip akunneranut marloriarluta timmisartuussisarnivut amerlisissinnaassallugit. Ukioq manna timmisartuussinerit naammassippata naliliissaagut. Pingaaruteqarporli eqqaamassallugu ukiup ataatsip iluani aqqut pitsaasoq pilersinneqarsinnaanngimmat. Anguniagaraarput aappaagu aqqut inissivissimassallutigu. Pissanganartorujussuussaaq ulloq taanna uuliamik aatsitassamillu ujaasinerit aallartilluarnissaat.
Canadap avannaanut angalaneq akisooq
- Siden lanceringen af ruten til Iqaluit har mange folk på vores artikler langet ud efter Air Greenland, fordi de mener, at prisniveauet på ruten er for høj. Hvad vil du sige til dem? Iqalunnut aqquteqalernissaa tusarliunneqarmat uagut allaaserisagut aqqutigalugit inuit Air Greenlandip akigititai qaffasippallaarnerarlugit naammagittaalliortarput. Taakkua qanoq oqarfigerusuppigit
- Maluginiarnikuuara inuit ataasiakkaat taamak oqaasertalersuisuusut. Soorlu oqaatigereeriga aqqut una inuinnarnit atorneqartussatut ilusilerlugu pilersinneqanngimmat inuussutissarsiortunilli. Canadap Avannaani angalaneq akisoorujussuuvoq. Assersuutigalugu Iqalunnit Ottawaliarneq akisuneruvoq Iqalunnit Nuummut aqqummit, Michael Binzer oqarpoq.
Nuummit Iqalunnut siumuinnaq aqqut 3.027'mit aallartippoq, Nuummit Ottawamut timmisartumut billitsit 6.277 siumuinnaq akeqarlutik.
Iqalunnut timmisartuussinerit Air Greenlandip Dash-8'iat 34'nut inissalik atorlugit ingerlanneqartassapput. Timmisartorneq nal. ak. ataatsimik minutsinillu 45'nik sivisussuseqarpoq. First Airip ullut tamaasa Iqalunnit Ottawamut timmisartuussisarnerinik pilersaarutit naapertorlugit nunatsinnit timmisartuussinerit ingerlanneqarput.
Juunip 15'iannit septembarip pingajuannut Air Greenlandip ataasinngornerit tallimanngornerillu tamaasa Iqalunnut timmisartuussisassaaq.