Jakob Larsen GOG-mi sungiusaasuuninngorpoq
Jakob Larsenip GOG-mik isumaqatigiissutigigallagaa maanna isumaqatigiissutivinngorpoq ukiuni tulliuttuni marlunni atuuttussatut
GOG-p unammeqataasartuutigaluni pisortaa Kasper Jørgensen tulluusimaarpoq nuannaarlunilu, sisamanngormat tusagassiortunik katersortitsinermi oqaluttuarigamiuk Jakob Larsen GOG-lu ukiunut tulliuttunut marlunnut isumaqatigiissuteqartut.
- Annertuunik pilersaaruteqarpugut. Ukioq manna qaffariarniarneq iluatasinngitsoorpoq, aappaaguli qaffariassaagut. Jakob Larsenimik isumaqatigiissuteqarnikkut sungiusaasuunertu atorfimmut pingaarutilerujussuarmut angut eqqorluinnartoq pissarsiaraarput, Kasper Jørgensen Sermitsiaq.AG-mut oqarpoq.
Unammisartoqatigiit nukittorsaataat
Tamanna peqatigalugu GOG-p aappaagu unammisartussani tamakkingajalerpai. Ullumi sisamanngornermi tusagassiortunik katersortitsinermi qallunaaq nunanut allanut unammisartuusimasoq ilisaritinneqarpoq. Taanna sæsonini arlalinni Polenimi unammisartuusimavoq.
Atuaruk "Dalby ajugaaffigilluataavippaat"
Atuaruk "Minik Dahl Høegh GOG-imut"
Minik Dahl Høegh qangali holdimut ilanngutereerpoq, maannalu Jakob Larsenilu HC Fyn-imit suleqatigiissimanertik nangissinnaalerpaat. Taamaasilluni Kalaallit Nunaat fynimiut klubbianni angusarissaartarluarsimasumi piginnaanilinnik sinniisoqaqqilerpoq. Siullermik tassani unammisartuuvoq Peter Sikemsen, taava arlaleriarluni Jakob Larsen, taavalu Rasmus Larsen maannalu Minik Dahl Høegh.
Jakob Larsen iluarisimaarinnippoq
- Isumaqatigiissut naammagisimaartorujussuuvara. Sæsoni pissanganartoq ornipparput, 1. divisionimi sukalasoorujussuarnik holdilimmi unamminerit tamavimmik pingaaruteqartassallutik, Jakob Larsen tusagassiortunik katersortitsinerup kingorna Sermitsiaq.AG-mut oqaluttuarpoq.
- Pingaartumik nuannaarutigaara klubbimi ataasiinnarmi sungiusaasuussagama, sæsoni kingulleq HC Fyn-imi unammisartuujutigalunga sungiusaasuusimagama aammalu juullimi uninnganerup kingorna HC Odense-mi Dameligami unammisartumi sungiusaasuusimallunga kiisalu qaffanniunnermi unamminerni kingullerni GOG-mi sungiusaasuusimallunga.
Tullianik Argentinamut
Tusagassiortunik katersortitsinerup kingorna Jakob Larsen tuaviinnaq Københavniliarpoq tassani nunanut allanut unammisartunut ilannguteqqilluni sisamanngormallu unnukkut naggataajusumik sungiusaatigalugu unammeqataalluni, nunanut allanut unammisartut tallimanngornermi ullaakkut Argentinamut aallannginneranni Amerikap Nunavissuani Pissartanngorniunnermut peqataajartorlutik.
Danmarkimi assammik arsaattartunit Jakob Larsenip angusai maluginiarneqarsimapput. Aallakaatitami Overtrådt, TV2 Midt-Vest-ip aallakaatitassiaani, assammik arsarnermik ilisimasallit Dameligami ukiup holdia ukiumilu sungiusaallammak toqqartussaavaat. Sisamanit marluk Jakob Larsen toqqarpaat.