Akerliullutik Maniitsumi tunisineq unitsippaat

Maniitsumi aalisartut Arctic Green Foodimut saarullinnik tunisiunnaarput akit apparnerannut akerliullutik

Bundgarnsfiskerne i Maniitsoq er blevet hjemme i dag, som protest mod prisnedsættelsen på et kilo torsk.

Ippassaq marlunngornermi saarullik kilomut 6 kroneqarpoq Maniitsumi tunisassiorfimmut tuniniaraanni.

Ullumikkut akia 5 koruunimut appartinneqarpoq. Taamaattumik bundgarnersiorlutik aalisartut qulit umiatsiaararsorlutillu Maniitsumik Arctic Green Foodimut tunisiumajunnaarput.

– Tamannarpiaq aamma pivoq ullut 14-it matuma siorna, saarulliup kilomut akia tunisassiorfiup siumut ilimasaarutigeqqaarnagu 6 koruuniniit 5 koruunimut appartimmagu. Aalisartut akerliunerisigut aqaguani akit 6 koruunimut qaffaqqinneqarput. Suliffissuullu neriorsuutigaa taamatut pisoqaqqissanngitsoq, aasallu ingerlanerani akit appartariaqassappata tamanna aatsaat juulip naanerani pissasoq. Taamaattumik aalisartut peqatigiiffiat suliffissuaq KNAPK-lu isumaqatigiissummik atsiorput.

Taama Sermitsiaq.AG-mut oqarpoq Maniitsumi umiatsiaararsortut peqatigiiffianni ilaasortaq.

Aalisartut naammagittaalliutigaat tunisassiorfimmit saarulliup akiata ullormiit ullormut appartinneqarnera. Akit appartinneqarnerannut akerliullutik bundgarnersortut tamarmik ullumikkut angerlarsimaannarniarput, umiatsiaararsortullu ikittuinnaat aalisakkanik allanik, soorlu qeeqqanik alisariarlutik.

– Aalisartut tunisassiorfimmut ippassaq allapput, nassuiaasoqaqqullugu sooq sapaatit akunneri marluk matuma siornagut isumaqatigiissut eqquutsinneqannginnersoq. Aalisartut saaffiginnissutaat suli akineqarsimanngilaq. Akissutisinissamillu tungaanut tunisiumajunnaarnertik ingerlatiinnarniarlugu, Frans Petersen oqarpoq.

Unammillernerup akit aalajangertarpaat
Maniitsumi Arctic Green Foodimi tunisassiornermut pisortaq Otto Stach nassuiaavoq saarulliit kilomut apparnerannut peqqutaavoq Norge Ruslandimilu qanittukkut pisaassanik annertuunik tuninieqarsimammata.

– Europami unammillernerup tunisinermi akit aalajangertarpaa. Norge Ruslandilu qanittukkut pisassinneqarujussuarput, tamannalu Europami tunisinitsinni malugisinnaalereerparput. Pisunik malinnaaniarsarivugut maskiinat sulisullu naleqqussarniarsarisimallutigik. Tamannali naammassimanngilaq. Saarulliup tunisassiarinera tuneqqinneralu akilersinnaasariaqarpoq. Europamili unammillerneq taama sakkortutigitillugu ajornakusoorpoq, Otto Stach oqarpoq.

Maluginiaqquaa aalisartut tamatigut nuannaartartut assersuutigalugu nipisat suaasa akii qaffakkaangata sumik peqquteraluarnersoq apeqqutigisarnagu.

– Siirunami ajuusaarutigaara aalisartut saarulliup nunarsuarmi akianit eqqorneqarmata. Aalisakkalli avammut tuninissaat aamma akilersinnaasariaqarpoq. Saarulliup akiata taamaatiinnarnissaanik tunisassiorfimmit atsiorsimanngilagut, taamaaliorsimasugullu isumaqarunik aalisartut isumaqatigiissut takutikkiartortariaqarpaat, Otto Stach oqarpoq.

Powered by Labrador CMS