Ineqarnermut ataatsimiititaliami ataatsimiinnermi Siumumiit ilaasortat anipput, atortussat taamaallaat qallunaatut allassimammata. 

Taama Siumumiit Inatsisartunut ineqarnermullu ataatsimiititaliami ilaasortaq Kim Kielsen nalunaaruteqarpoq.

Kim Kielsen naapertorlugu naalakkersuisooqatigiit nassuiaatigaat atortussat Danmarkimeersuusut, taamaattumillu ataatsimiititaliami atulersinnagit nutserneqartariaqarnerat pisariaqarsorineqarani. 

- Partiit naalakkersuisooqatigiit Inatsisartunut ilaasortat kalaallisut oqaasillit atortussaminnik kalaallisut atuarusuttut ataqqisariaqarpaat, Kim Kielsen oqarpoq nangillunilu:

- Allatut iliornermi nunatsinni kalaallisut oqaatsitta pisortatigoortumik atorneqarnissaannik inatsimmik ataqqinninnginneruvoq, innuttaasullu nammilersulernissamik akuersinerannik tunutsinerulluni, tassanimi kissaatigaat kalaallisut oqaatsivut pisortatigoortumik oqaasiussasut.