Bendt Frederiksen toquvoq
Inatsisartut siulittaasorisimasaat piniartoq Bendt Frederiksen, Siumut, 72'nik ukioqarluni Nuussuarmi toqukkut qimaguppoq
Bendt Frederiksen, tallimanngorneq juunip arfineq-aappaat aanaartoornermi kingorna tassanngaannaq Nuussuarmi toqukkut qimaguppoq.
Upernavimmi ernuttaminik atuartunik umiatsiaminik aallerniarluni aanaartorpoq uppillunilu.
Taama nalunaarpoq ilaqutariinnut qanigisat ilaat. Ajoraluartumik ullumikkut ilaqutai qaninnerit pissarsiarisinnaanngilagut.
Bendt Frederiksen, Kullorsuarmi inunngorpoq juulip sisamaanni 1939.
Meeqqat atuarfiat naammassigamiuk piniartussatut perorsarneqarpoq. Kisianni inuunermini politikki aalluppaa. 28'nnarnik ukioqarluni Upernavimmi kommunalbestyrelsimut nunaqarfimmit Nuussuarmit ilaasortatut qinigaaqqaarpoq, kommunalbestyrelsimut ilaasortaalluni 1967'imiit 1971 tikillugu. 1962-64 kommunefogeditut atorfeqarpoq.
1975'imi Kalaallit Nunaata Landsrådianut qinigaavoq 1995 tikillugu Inatsisartunut ilaasortaalluni. 1991'imiit 1995'imut Inatsisartut siulittaasuattut issiavoq. Tamatuma saniatigut Inatsiartut Isumaginninnermut ataatsimiititaliaanni siulersuisuuvoq. Ataatsimiititaliarpassuit aalajangiisartullu ilaasortaaffiginikuuai, soorlu inunnik isumaginninneq pillugu ataatsimiititaliaq tassani ukiorpassuarni suliamik angisoorujussuarmik suliaqarluni. Ataatsimiititaliamut tassunga suli ilaasortaalluni tassanngaannaq toqukkut qimaguppoq.
1954'imi Oqaatsuni Blå Kors aallarnisaaqataaffigai aamma Nuussuarmi 1961. Nuussuarmi 1960 piniartut peqatigiiffiat aallartippaa tamatuma saniatigut Upernaviup kommuniani piniartut ataatsimoorussamik peqatigiiffiat aallartillugu.
Bendt Frederiksen, Kong Christian d. Xs og Dronning Alexandrines Fondimit 1965 nersornaasigaavoq. 1991 Ridderkorsetimik saqqarmiulerneqarluni kiisalu Nersornaat kuultiusoq 1992 pissarsiaralugu.
Kunngikkormiut 1997 Kalaallit Nunaannut tikeraaramik Nuussuaq aamma tikippaat tassani Bendt Frederiksenikkunni kaffisoriartortinneqarput. Ajoraluartumik taamanikkut dronning peqataanngilaq Nanortalimmit angerlaannartariaqarami niulunnini pissutigalugu. Kisianni Prins Henrik aamma prins Joachim taamanilu prinsesseusoq Alexandra pulaaqataapput.