Maanna eqqakkat immikkoortiterneqartalissapput

Qeqqata Kommunia aamma A/S Inissiaatileqatigiifffik INI suleqatigiilluinnarlutik eqqagassanik immikkoortiterineq isumagissavaat

Eqqaaviit nutaat Sisimiuni erseqqissumik inaalissorneqarsimapput. Qeqqata Kommunia INI aamma kommunimi sulisut eqqaaviit illoqarfimmut inississunnginneranni naammassillugit iluarsaakkaat. Assi: Qeqqata Kommunia

Sisimiut illoqarfianni eqqaaviit nutaat aqqusinerni takussaalerput

Qeqqata Kommunia aamma A/S Inissiaatileqatigiiffik INI qanimut suleqatigeeqqissaarlutik illoqarfimmi eqqakkanik immikkoortitsinermik ingerlatsilerput.

Kommunip aamma INIp containerit arfineq-pingasut qillertuusanut igalaaminernullu eqqaaviit inississorpaat. Tamatuma saniatigut eqqagassanut avatangiisinut ulorianartunut eqqaavik kommunimit inaalinneqarpoq. Containerit Sisimiut illoqarfiani ataatsimoorfiusunut inississugaapput taamaaliornikkut innuttaasut ajornanngitsunnguamik eqqagassat immikkoortitikkat eqqarsinnaallugit. Taama nalunaaruteqarpoq Qeqqata Kommuniani tusagassiinermik sulialik Anne Hjortkjær.

Taama iliuuseqartoqarpoq Sisimiuni kissaatigineqarmat eqqagassanik immikkoortitsisarneq pitsanngorsaqqullugu.

Ilisimatusarnermi paasisat ersersippaat eqqakkat ulorianartunik akullit amerlavallaat suli ikuallaavinnut annguttartut. Eqqagassanik immikkoortiterisarnerup nassataanik ikuallaavimmi isumaginninneq suli pitsaanerulissaaq, kommunilu aningaasanik sipaaruteqassaaq minnerunngitsumillu pinngortitaq illersorneqassalluni.

Containerit saqqummiunneqarput sapaatip akunnerata naanerani eqqakkat pillugit sammisaqartitsinermut atatillugu EQQAKK@T aamma Saliineq 2012 ingerlanneqarmata.

Suleqatigiit marluk quppersakkamik saqqummiussaqarput Sisimiuni inoqutigiinnut tamanut agguaanneqartoq. Tassani takussutissaqarpoq illoqarfimmi eqqakkat assigiinngitsut sumut tunniussuunneqartarnissat.

Quppersagaq aamma Sisimiuni atuarfinnut tamanut nassiunneqarpoq eqqakkat pillugit sammisaqarnissamik kajumissaatitalimmik - ajornanngimmat atuarfinni immikkut sammisassatut.

Kommunimit aamma INImit neriuutigineqarpoq eqqagassanik tunngasunut suleqatigiinneq ineriartussasoq siunissami eqqagassanik immikkoorsitsisarneq innuttaasut akornanni ulluinnarsiutaalernissaa anguneqarniassammat.

Powered by Labrador CMS