Kina nunatsinni milliardilikkaanik atuinissamut piareerpoq
Kinamiit aningaasaliiniartut Nuummi, Ilulissani, Qaqortumi Kangerlussuarmilu milliardilikkaanik aningaasaliinissaminnut piareerput
1,3 milliard koruunit tungaanut.erlingske Business naapertussagaanni aningaasat taama amerlatigisut Kinamiit aningaasaliiniartut nunatsinni atortulersuuteqarnikkut pitsanngorsaanernut atussallugit piareersimapput.
Aviisi naapertorlugu sapaatip akunnerata tullianiluunniit isumaqatigiissuteqarsinnaapput, Kinamiut præsidentiat Hu Jintao pisortatigoortumik Danmarkimut tikeraarpat.
Berlingske Business nppertorlugu tassani pineqarpoq 170 million koruunit atorlugit Nuummi Ilulissanilu mittarfiit tallinissaat. Taassuma saniatigut Kinamiut piareersimapput 640 millon koruunit atorlugit Qaqortumi mittarfiliornissaminnut, kiisalu 100 million koruunit atorlugit Kangerlussuarmi mittarfik pitsanngorsarlugu.
Aamma 400 million koruunit atorlugit Nuummi talittarfissamik aningaasaliiniarput, aviisi naapertorlugu.
Angunikkatik angorusuppaat
Kinamiut nunatsinni aningaasaleerusunnerat tassaavoq siunissami tunisassiornermi atortussaminnik qulannaariniarnermut takussutissaq, Berlingske Businessimi allassimavoq, tassanilu pineqarput kanngussak, kuulti, aatsitassat qaqutigoortut, uulia gassilu Kalaallit Nunaanniittut.
Kina siusinnerusukkut Afrikami taamaattumik periuseqarsimavoq, tassani Kinamiut 1 million missaat ullumikkut sulillutik. Tassanili Kinamiut taamaallaat atortulersuutinut aningaasaliinngillat, aammali timersortarfissuit ilinniarfiillu aningaasaliiffigaat.
Sermitsiaq.AG-miit attaveqarnermut naalakkersuisoq Jens B. Frederiksen Demokraatineersoq oqaaseqartinniarneqarpoq.