Politiini suliat nutaat 54'it nalunaarsorpaat

Nuummi politiit oqaluttuaraat sapaatip akunnerani qaangiuttumi suliassaaleqisimanatik. Suliat nutaat 54't aallartinneqarsimapput. Ilaatigut politiinut persuttaanerit, ikuallannerit, aalakoortut angerlarsimaffinnilu eqqissiviilliornerit ulapputaallutik

Assi: Leiff Josefsen

Sapaatip akunnerani Nuummi politiit nalunaarsuiffiat pisimasorpassuarnik imaqarpoq. Rapportit 54'it sapaatit akunnerisa 22'anni suliarineqarput.

Persuttaanernit suliat marluk sapaatip akunnerani nalunaarsugaapput ilaatigut atorfilimmut persuttaaneq, tassani nivissap 16'inik ukiulik politeeqarfimmi politiimik isatseriaraluarnera ilaalluni.

Umiatsiani tillinniarnerit sisamat nalunaarutigineqarput. Angallataatillit kaammattorneqarput umiatsiaminnit suut tillinneqarsinnaasut peeruminartut tuniniaruminartullu ittujaarluartaqqullugit.

Aningaasat salloqittaatit nalunaarutigineqarsimapput. Maajip 29'anni Grønlandsbanken nalunaaruteqarpoq pisinniarfiit ilaannit maajip 26'anni aningaasat eqqussat ilaat 500 koruunimik salloqittaammik ilaqarsimasut. Inuit qinnuigineqarput aningaasanik salloqittaatinik kaaviiaartoqarsinnaanera mianersorfigissagaat.

Ikiaroornartumik suliat nutaat sisamat aallartinneqarsimapput.

Biilit pingasut tillinniarfigineqarput biilini marlunni igalaat aserorneqarsimallutik.

Meeqqat ulluannut atatillugu meeqqat arpannerat pissutigalugu aqquserngit marloriarlutik matuneqarput. Taamaaliortoqarpoq sillimanissaq anguniarlugu meeerarpassuit aqqusinerni pisullutillu arpannerat pissutigalugu.

Persuttaanertalimmik tillinniartoqarniarnera nalunaarutigineqarpoq. Niuernermut ilinniarfiup eqqaani angutip 16'inik ukiullip angut 54'inik ukiulik tillinniarfiginiaraluarpaa. Tamanna inunnit allanit takuneqarpoq taakkualu erngerlutik politiinut kalerriipput. Angut 16'inik ukiulik tigusarineqarpoq misissuiffigineqarlunilu. Angut 16'inik ukiulik eqqartuussivimmi killisiorneqanngilaq politimestereqarfimmi inatsisilerituunit siunnersorneqarnerup kingorna angutip ukiukippallaarnera isiginiarneqarmat.

Juunip aallaqqaataani ikuallatsitsisoqarpoq. Sanap eqqaani containeri ikinneqarpoq. Ikuallatsitsisoq tiugsarineqarpoq ullup ingerlanerani eqqartuussivinnut sassartinneqarluni. Angut 2012'imi juunip 29'ata tungaanut tigummineqarallassaaq. Ikuallatsitsinermut tunngasoq Nuummi Politiinit misissuiffigineqarpoq.

Tillinniarnernit suliassat nutaat 25 pilersinneqarput.
Aasarpoq sapaatillu akunnerata ingerlanerani silagittaqattaarnera pissutigalugu politiit arlaleriarlutik sumiiffinnit assigiinngitsunit imertunik aalakoorpallaartunik qimagutsitsiniartarput. Angerlarsimaffinni eqqissiviilliornerit katillutik aqqaneq-marluusimapput, inuit 15'it aalakoorpallaartut imaluunniit silaannarmi sinittut imaluunniit allanut akornutaasut nalunaarutigineqarput qulingiluariarluni aqqusinerni eqqissiviilliortoqarpoq.

Politiit inuit 22't tigusarisimavaat taakkunannga ataaseq tigummineqarallassalluni. Katillugit suliat nutaat 54't aallartinneqarsimapput.

Powered by Labrador CMS