Venusip aqqutaa takulaarlugu
Pingasunngornermi juunip arferngani 2012 pisartut qaqutigoortut takuneqarsinnaassaaq ulloriarsuup Venusip seqerngup aqqutaanut pulassaaq. Sila ajunngippat tamanna takuneqarsinnaassaaq aamma Nunatsinni
Juunip arferngani ullaakkut iteriartoqartariaqarpoq imaluunniit juunip tallimaanni pigaarujussuarluni ulloriarsiortartunut qilammi alutornartumik takusaqarusukkaanni. Sila ajunngippat takuneqarsinnaassaaq venusip seqinermut pulanera.
Taama pisoqartarnera Venuspassagemik taaneqartarpoq ullorissanik soqutigisalinnit immikkut soqutiginarluni, taamaattup malittarinera aamma oqaluttuarisaanermi atorneqartarpoq silaannarsuarmi ungasissutsinik uutortaanernut. Kingullermik taamak pisoqarpoq juunip arfineq-pingajuanni 2004 Danmarkimit takuneqarsinnaalluni. Juunip arfernganni pisoq taanna tupinnartoq Nunatsinnit malinnaaffigineqarsinnaavoq.
Ulloriarsuup Venusip seqinermik sanioqqutsitsinera Nunarsuarmit isigalugu allaanngilaq toornersaq qernertoq seqerngup sinaagut ingerlaartoq. Seqineq sinerlugu ulloriarsuup taama ingerlaarnera nal. ak. arfinilinnik sivisussuseqartarpoq. Ukiut 343't ingerlaneranni piffissat aalajangersimasut iluanni taamaattoqartarluni. Ukiut arfineq-pingasut iluanni marloriarluni seqinermik sanioqquttarpoq tullissaanik ukiut 121,5 aamma 105,5 ingerlaneranni ukiut arfineq-pingasukkaarlugit pisarluni. Tullissaanik taamak pisoqassaaq decembarip aqqarnganni 2017 piffissami tassani nunatsinnit pisoq isiginnaarneqarsinnaassanngilaq Kalaallit Nunaanniikkaanni.
dmi.dk ilisimatitsivoq juunip tallimaanni seqineq Nuummi nal. 01.41 UTC - UTC eqqarsaatigissagaanni tassa juunip arfernganni kisianni maani Kalaallit Nunaanni juunip tallimaanni Nuummi nalunaaqqutaq 23.41 missaanni. Venusip seqineq sinerlugu ingerlarnga 22.09 UTC aallartissammat nal. ak. pingasut piffissaraagut Venusip seqinermik atuuineranik isiginnaassalluta.