Angutit sisamat atornerluisimannginnerarpaat
Illoqarfiup eqqartuussiviani niviarsiaqqap angutaa allallu pingasut niviarsiaqqamik atornerluisimasutut unnerluunneqarput. Maanna landsrettip iperagaasippai
Angutit sisamat illoqarfimmi eqqartuussivimmit niviarsiaqqamik Vejlemi kolonihavehusimi annertuumik kinguaassiutitigut atornerluisimanerannik eqqartuunneqartut tallimanngornermi Venstre Landsretimit iperagaasut, Vejle Amts Folkeblad allappoq.
Koldingimi eqqartuussivimmi niviarsiaqqap angutaa ukiunik pingasunik qaammatinillu pingasunik parnaarussassanngortinneqarpoq, niviarsiaraq arfineq-pingasunik qulingiluanillu ukioqartoq arlaleriarlugu atoqatigisarsimanera pillugu. Tamatuma saniatigut niviarsiaraq angutinut sisamanut allanut "atortittarsimavaa", taakkunannga angut ataaseq maanna qanganngoreerpoq.
Koldingimi Eqqartuussivimmi unnerluunneqartut allat marluk tarnikkut innarluutillit inissiisarfiinut inissinneqartussanngorlugit pineqaatissinneqarput, angullu kalaaleq 54'inik ukiulik qaammatini pingasuni parnaarussassanngortinneqarluni.
Atornerluisarnerit ataataasup Vejlemi kolonihavehusiani 2002 aamma 2003 pisarsimaneragaapput. Aatsaalli 2009 niviarsiaqqap 1994 inunngortup imminooriaraluarnermi kingorna qanigisaminut pisut oqaluttuarisimallugit.
Siullermik oqaluttuarpoq Lystrupimeersunit nukappissanit pinngitsaalineqarsimalluni kingornali nassuiaanini allanngortillugu oqaluttuarpoq ataatami kinguaassiutitigut atornerlorujussuarsimagaani soorlu ikinngutiminut atortittarsimalluni.
Oqaluttuaminik allanngortitsinera taannarpiaq pissutaalluni Venstre Landsretip tallimanngornermi aalajangiuppaa angutit sisamat iperagaanissaat.
Qangali pisut pissutaallutik pisut pillugit teknikkikkut uppernarsaatissaqanngilaq, Vejle Amts Folkeblad naapertorlugu Koldingimi Eqqartuussivimmit paarlattuanik landsretti isumaqarpoq, niviarsiaqqap nassuiaatai uppernarsaatissaqanngitsut.