Skip to main content

Nuuk illoqarfittut katersugaasiveqartariaqarpoq

Nuummit Eqqaamasat siulittaasua Orla Dalager isumaqarpoq napparsimmavitoqaq Nuutoqqamiittoq katersugaasivissatut pissanganartutut piukkunartuusoq

Nuuk pisimasoqarfiulluartumik sivisuumillu oqaluttuassartaqarpoq 1728-mi aasakkut Hans Egedep illuliorneraniit aallartittumik.

 

Sinerissami illoqarfinnut allanut tamanut nunaqarfinnullu arlalinnut sanilliulluni illoqarfiit pingaarnersaat namminerisaminik katersugaasiveqanngilaq, illoqarfiullu oqaluttuassartaata ilarujussua Nunatta Katersugaasiviani Allagaateqarfianilu toqqorsivinni toqqortaatigineqarluni.

 

Illoqarfiup oqaluttuassartaa peqatigiiffiup Nuummit Eqqaamasat saqquminerulersikkusuppaa, illoqarfiullu Nuutoqqami napparsimmavittoqami aaqqissuunneqartumik katersugaasiveqalernissaa peqatigiiffiup suliassatut pingaarnertut anguniarusuppaa.

 

Oqaluttuarisaaneq pissanganartoq

– Sooq Nuummi illoqarfiup katersugaasivianik katersugaasiveqalissaagut?

– Nunatta katersugaasivia, eqqumiitsulianut katersugaasivik kiisalu palasimut eqqumiitsuliortumullu Niels Lyngemut illu eqqaassutissaq Nuummiipput, taakkuli illoqarfiup oqaluttuassartaanut katersugaasivimmik pisariaqartitanut matussusiinngilluinnarput, Nuummit Eqqaamasat siulittaasuat Orla Dalager Nuuk Ugeavisimut oqarpoq.

– Nuuk ukiuni qulikkuutaani ineriartupiloorsimavoq kranersuillu ukiorpassuarni illoqarfimmut ilisarnaataasimallutik – ukiut 30-t matuma siorna Nuussuaq pilersinneqarpoq maannalu Qinngorput illuliorfiuvoq. Ineriartornermit tingitaassanngikkutta sorlaqarfitsinnik tammatsaaliuinissaq aatsaat taama pingaaruteqartigilerpoq.

Sorsunnersuup Kingulliup kingorna ineriartorneq illoqarfiup oqaluttuassartaanut pingaarutilerujussuarmik ilaavoq, sanasullu Nuummik nutaaliaasumik ajunngitsuni ajortunilu sanaartortut oqaluttuaannik katersinissaq nukinginnarsivoq.

– Illoqarfiup katersugaasivia sunik imaqassagami?

– Napparsimmavitoqqami init quleriit pingaarnersaat Nuummit eqqaanillu sammisat pillugit saqqummersitanik ataavartunik nikerartunillu aaqqissuussivigineqarsinnaavoq, Orla Dalager oqaluttuarpoq.

Init naqqup ataaniittut illoqarfiup oqaluttuassartaanut toqqorsivittut atuartitsivittullu aaqqissuunneqarsinnaapput. Pineqartut illoqarfimmi atuarfinni ilinniarfinnilu atuartunit ilinniartunillu atuartitsivittut atorneqarsinnaapput, oqaluttuarisaanermillu soqutigisallit sammisani oqaluttuarisaanermut tunngasuni neqeroorutigilersaakkatsinni itisiliillutik sammisaqarsinnaallutik.

– Takorloorpavut »radiup initaa« Nuuk pillugu oqaluttuanik immiussanik tusarnaarfiusinnaasoq, »TV-ip initaa« illoqarfimmit immiussatoqqanik isiginnaarfiusinnaasoq, Nuuk pillugu qalipakkanik assilisanillu saqqummersitat, »ini atuartarfik« illoqarfik pillugu atuagassianik atuakkanillu imalik, inilu allakkianik oqaluttuarisaanermut pingaarutilinnik igalaalersukkanut iliorakkanut saqqummersitsivik, assersuutigalugu Nuup kommunitoqaani innuttaasut 10.000-issaat pillugu allakkiaq. Qarasaasiakkut ilaqutariit »Nuummiutoqqat« soorlu Holmikkut, Heilmannikkut, Lyngekut Egedekkullu pillugit kinguaariittut oqaluttuassartaat oqaluttuarineqarsinnaapput.

– Soorunami aamma illoqarfimmit eqqaanillu pigisatoqqanik saqqummersitsiveqassaagut, illoqarfiulluk katersugaasivissaanut atuagassianik, assinik assilissanillu allanillu ujaasilluta aallartereerpugut. Sullivimmi nalunaarsuisarfiusumi, aanaveersaasarfiusumi iluarsaasarfiusumilu utoqqaanerit namminneq kajumissutsiminnik suleqataallutik ikiorsinnaassavaatigut.

 

Inuiaqatigiit pigissaarnerat

Peqatigiiffik Nuummit Eqqaamasat novembarip 24-ani 2011-mi pilersinneqarpoq ullumikkullu 170-inik ilaasortaqarluni. Siulersuisut oqaluttuarisaanermillu soqutigisallit sisamanngornermi Narsarsuarmi Blok-imi naapeqatigiittarput.

Napparsimmavitoqaq Namminersorlutik Oqartussanit pigineqarpoq, peqatigiiffimmillu pilersaarusiat illullu tigunissaanik qinnuteqaat naalakkersuisut siulittaasuannut Kuupik Kleistimut nassiunneqarsimapput, tassanngalu kultureqarnermut naalakkersuisumut Mimi Karlsenimut ingerlateqqinneqarlutik.

Illoqarfinni katersugaasiviit kommuninit akisussaaffigineqarput, taamaattumillu peqatigiiffiup takorlugaanik borgmester Asii Chemnitz Narup aamma Kommuneqarfik Sermersooq Orla Dalagarimit ilisimatitsissuteqarfigineqarsimallutik.

Nuummit Eqqaamasat katersugaasiviliornissamik pilersaarutaata qulequtaraa:

– Inuiaqatigiit pigissaarnerat inuiaqatigiit piorsarsimassutsikkut kingornussarsianik aqutseriaasiatigut uuttorneqarsinnaavoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER