Skip to main content

Danmarkimi inatsit nutaaq kalaallinik eqquisoq

Meeqqanut inuusuttunullu tapiissutini katersisarnissamik periuseq pillugu Danmarkimi inatsimit kalaallit Savalimmiormiullu Danmarkimut nuuttartut eqqorneqartarput. Tamanna IA'meersup Sara Olsvigip allanngortikkusuppaa

Ilaqutariinnut meerartalinnut tapiissutit, meeqqanut akilersuutit meeqqallu tapisiaat pillugit katersisarnissamik periutsimik Danmarkimi inatsit nutaaq januaarip aallaqqaataani atuutilerpoq.

Inatsimmi nutaami Danmarkimi naalakkersuisut siuliinit akuersissutigineqartumi malittarisassat sukaterneqarput, taamaalillutillu innuttaasut Danmarkimut nuuttut tamarmik ukiut qulit iluanni minnerpaamik ukiuni marlunni Danmarkimi najugaqartariaqarlutik meeqqanut inuusuttunullu tapiissutinik tamakkiisumik pisinnaassagunik. Inatsisip katitigaanerata kinguneranik kalaallit Savalimmiormiullu Danmarkimut nuuttartut aamma eqqugaapput. Naak kalaallit Savalimmiormiullu Danmarkimut innuttaassuseqaraluartut.

Taamaattumik Sara Olsvigip Inuit Ataqatigiit sinnerlugit Folketingimut ilaasortaasuå Savalimmiunillu ilaasortaasup aappaata akileraartarnermut ministeri Thor Möger Pedersen aperisimavaat Danmarkimut innuttaassusilinnik assigiinngisitsineq tamanna qanoq isumaqarfigineraa.

Sara Olsvigimut akissutimini akileraartarnermut ministeri ilaatigut allappoq: ”Apeqqutip matuma akineqarnissaanut atatillugu inunnik isumaginninnermi tapiissuteqartarnermut inatsisini Danmarkimi siumoortumik najugaqarsimanissamik piumasaqaatinik aalajangersaasoqarsimagaangat Kalaallit Nunaanni (Savalimmiunilu) naalagaaffeqatigiinnerup ilagisaattut najugaqarsimanerup Danmarkimut najugaqarsimanermut naliginneqartarnera ileqquusoq paasitinneqarpunga”.

Taamali sullissinermi pisoqartanngilaq, taamaattumik ministerip atorfilittani qinnuigai malittarisassanik misissueqqissaaqqullugit piffissamik katersisarnissamik periaatsip iluarsiivigineqarnissaanut periarfissanik naliliinissaq siunertaralugu.

Olsvig: Inatsit nutaaq eqquinerluppoq
- Inatsit nutaaq kalaallinut piffissani sivisunerusuni sivikinnerusuniluunniit Danmarkimiittunut eqquinerluppoq, pingaartumillu kalaallit meerallit kisimiittut eqqugaallutik. Taamaattumik isumaqarpunga equngassutip tamatuma iluarsineqarnissaa pingaartuusoq, tamatumunnga atatillugu kalaallit qanorluunniit sivisusseqartumik Danmarkimiissimagaluarunik Danmarkimut inuttaassusilinnut naligitinneqalersinnaaqqullugit, Sara Olsvig oqarpoq.

Suliaq aaqqiisoqarnissaata tungaanut qanimut malittariniarlugu neriorsuivoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER