Skip to main content

Bee Gees-ikkunni tusaamasaq toquvoq

Qaammatit arlallit napparsimareerluni Robin Gibb sapaatiummat kræftimik toquvoq. 62-inik ukioqalerpoq 

Tuluk erinarsortartoq erinniortorlu Robin Gibb toquvoq. 62-inik ukioqarluni toquvoq, qaammatinilu arlalinni kræfternerminik Londonimi napparsimmavimmi katsorsarneqarsimavoq.

Robin qatanngutigiit angutit pingasut ilagaat, nipilersoqatigiinnik Bee Gees-ikkunnik, nunarsuarmi tamarmi nuannarineqartunik, pilersitsisut.

Bee Gees ilisimaneqarnersaapput 1970-ikkunni diskomik nipilersukkanik nuannarineqarluaatiminnik, ilaatigut "Stayin´ Alive", "Night Fever" kiisalu "Jive Talking". Nipilersoqatigiit 1960-ikkunniit ukiuni qulikkaani tamani, ukiut untritilikkaat uku aallartinnerat tikillugu, nuannarineqarluartuusimapput, nuutillu tunisaat 200 millionit sinneqarput.

Marluliaqammi Maurice-p angajumilu Barry Gibb-ip nipilersoqatigisarnerisa saniatigut Robin Gibb aamma kisimiilluni nipilersortarpoq. 1970-imiit 2006-imut nuutinik arfinilinnik saqqummersitsivoq, 2009-milu Tuluit Nunaanni nuannarineqarnerpaanut ilaavoq Bee Gees-ikkut atorsimasaat nutaamik immiussaa "Islands In The Stream".

Angerlarsimaffik nipilersorfiusaqisoq

Taanna 1949-mi qeqertami Isle of Man-imi inunngorpoq angerlarsimaffimmi nipilersornermik aallussiffiulluartumi. Arnaa Barbara erinarsortartuusimavoq angutaalu Hugh orkesterini pisortaasimavoq. 1955-imi ilaqutariit Manchesterimut nuupput. Tassani nukappiaqqat pingasut filmertarfinni unillatsiarnerni aliikkusersuisalerput.

1958-imi Tuluit Nunaat siallerajoqisoq qimallugu seqinnerluartartumut Australiamut nuupput, illoqarfimmut Brisbanemut. Tassani qatanngutigiit Brothers Gibb-ikkunnik atserlutik aliikkusersuisarput namminerlu tv-mi aliikkusersuisarfeqalerlutik. Kingorna atertik BG-mut allanngortippaat, Bee Gees-itullu ateqalerput.

- Inuunerput tamaat nipilersuusiorusuttarsimavugut, imatullu ineriartorpoq, uagutsinnik paasinnissinnaasutuat tassaallutik uagut nammineq. Inuit allat toqqissisimanartissimanngilagut. Inuttut ataatsitut issimavugut, Robin Gibb-ip qatanngumminut attuumassuteqarnini The Guardian malillugu taamatut allaaseraa.

1966-imi qatanngutigiit nunamut inunngorfimminnut uterput pop-ip nuannarineqarlualeruttornerata nalaani.

2010-mi Robin Gibb annertuumik naamigut pilatsippoq. Tusarnaartitsinissani arlallit kiisalu Brasiliamut angalalluni tusarnaartitseqattaarnissani taamaatiinnartariaqarsimavai. 2011-mi nappaataa suussusersineqarpoq, tassalu tingummigut kræftertoq.

Robin Gibb marloriarluni katissimavoq. Qimatarai nulii Dwina qitornanilu arlallit.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER