Danmarkip prinsessea qanoq ateqassava
Prinsessearaq immaqa Mariep arnaanut atsiunneqassaaq, kisianni Margrethe aamma atertaareratarsinnaavaa, atit pillugit ilisimasalik oqarpoq
Prinsesseaqqap Møgeltønderip Oqaluffiani sapaammi danksit nalunaaqutaat naapertorlugu tallimanut (nunatsinni ataatsimut) kuisinnaa sioqqullugu kunngikkormiunik nuannarisallit akornanni atissaa eqqoriaqattaarneqarpoq. Prins Joachim aamma prinsesse Marie panissaavat januaarip 24'ani inuusup atissaa tusarliunneqassammat. Eqqoriaannerillu imaaginnavipput.
Københavns Universitetiani Nordisk Forskningsinstitutimi atit pillugit ilisimatusartoq Birgit Eggert eqqoriaaqattaartunut peqataarusuppallaanngikkaluarpoq atsiunneqarsinnaasut amerlavallaaqimmata, taanna oqarpoq:
- Eqqoriarpara prinsesse arlaannut atsiunneqassasoq kisianni kimut taanna naluara. Qanganisarsiorpalaarput angajulliliartik atseramikku Henrik. Eqqoriarpara aamma maannakkut taamaaliussasut, Birgit Eggert Ritzau'imut oqarpoq.
Ilimanarneruvorli prinsessearaq kunngikkormiut qitornai allat assigalugit sisamanik atserneqassasoq. Atinik ilisimatusartoq naapertorlugu siornatigut ileqquuvoq meeraq siulleq aataminut imaluunniit aanaminut atsiussaasarnera, ilimanarsinnaavoq prinsesseaqqap atiisa ilagissagaat Margrethe.
Birgit Eggert naapertorlugu tupaallaataanavianngilaq aappariit franskit ileqqui naapertorlugit prinsesse Mariep arnaata aqqa Françoise ilanngutissagaat: - Soorlu taanna ilimanartoq kisianni danskinut aamma taajuminartuunissaa pingaartinneqassagunarpoq, danskimmi franskit aqqi ilaanni taajuminaatsissinnaasarpaat, Birgit oqarpoq.
- Prins Joachim aamma prinsesse Marie piumagunik qanorluunniit atsiussisinnaapput. Kunngissakkut qitornereerput prinsesseararlu allanik qatannguteqarmat taassuma Danmarkimut dronninginngornissaa ilimanaateqanngimmat qanorluunniit atsiussisinnaapput.
Birgit Eggertip institutsimi suleqataa, lektor Michael Lerche Nielsen, prinsesseaqqap inunngutsiarnerata kingorna mianersortunnguamik atissaanik eqqoriaavoq, taassuma ilimagaa prinsessearaq Philippa Marie Louisa Françoise atserneqarsinnaassasoq.