Canadamiut dollarsii atulissavagut?
Business Insider qulequttap ataani allapput: Islandip krone canadamiut dollarsiinik taarsernissaannik pilersaarutaa piulluanngitsoq iluatsissappat, Kalaallit Nunaat malinnaassanerluni
Kalaallit namminneq aningaasassaanik pilersaarutit utaqqisut unittarfiannut imaluunniit eqqaaqqikkumanngisat toqqorsiviannut ilineqalaaginnanngillat, nutaarsiassaqartitsivik BI.com, Business Insider allaserisaqarmat, Kalaallit Nunaata Island malissagaa, Islandip Króna atorunnaarlugu canadamiut dollarsiinik atuisunngorpat.
Allaserisami qulequttap imaattup ataani: If Iceland Actually Goes Through With Their Crazy Plan To Adopt The Canadian Dollar, Greenland Probably Would Too
Misissukkami ilisimatitsissutigineqarpoq "tusaannarlugu sianiitsuliornerusoq", kisianni Islandimi tusatsiakkat oqallisaaqaat. Kingullermik islandimiu aningaasaliinermik pisortaq Heidar Guðjónsson, qanittumi Canadami oqalugiarnermini nalunaaruteqarpoq, qularutiginagu Kalaallit Nunaata danskit koruuniat atorunnaassagaat - Islandip Loonie (canadamiut 1 dollariat) atuleraluarpagu. Aningaasanut allanut nikinniarneq nunarsuarmi tamarmi aningaasameernermit aallaaveqarpoq, tamanna Islandimik eqquinerlurujussuarmat. Euro'mut ilanngunnani islandimiut naalakkersuisuisa kajumigineruaat - aammami Gallupip innuttaasunik apersuinerani ersermat innuttaasut 70 procentiisa canadamiut dollarsiannik atuilernissaq kajumigineqarnerusoq.
- Canadamiut dollarsiannut nikinnermi Island (aamma Kalaallit Nunaat) siunissami aningaasamik ajornartoorujussuarnissat pinaveersaassavaat aammalu (Island aamma Kalaallit Nunaat aaqq.) aningaasat nalinganik allanngorannginnerusumik atugaqalissapput. Siunissaq ungasinnerusoq eqqarsaatigalugu Issittumi Siunnersuisoqatigiinnut ilaasortat nunat pingasut canadamiut dollarsianik atuagaqalissagaluarput ataasiinnaajunnaarluni, Guðjónsson oqarpoq.
Isumaqarpit ungasinnerusoq eqqarsaatigalugu Kalaallit Nunaata canadamiut dollarsianik atugaqalernissaa iluaqqutaassasoq?