Kalaallit Nunaat puljemi ajornarnerpaami
Assammik arsarluni Pan Amerikamiut unammersuarneranni Argentinami pisussami maqitsinermi nunarput puljemi ilungersunarnerpaami inissippoq
Pan Amerikamiut angut assammik arsaallutik unammersuarnissaanni Argentinami juunip 18-24 Buenos Aires'imi ingerlanneqartussami unamminissanut makitsisoqareerpoq. Kalaallit Nunaat puljemi sakkortunerpaanik unammisussalimmi inissippoq, Argentina aamma Chile siorna VM'imut peqataasut puljeqatigineqassallutik.
Nalinginnaasumik nunat arfineq-pingasut Pan Amerikamiut pissartanngorniunnerini peqataasarput, ukioq manna peqataasussat amerlanerupput nammineq kajumissutsi naapertorlugu peqataaniartoqarsinnaammat. Ukioq manna holdit qulit ilaassapput puljemut marlunnut aggutaarlutik:
Pulje A:
Argentina
Chile
Grønland
USA
Venezuela
Pulje B:
Brasilien
Uruguay
Dominikanske Republik
Mexico
Paraguay
Puljenit holdit angusarinnerpaat marluk semifinalinut ingerlaqqissapput. Argentinap gruppimini ajugaanissani naatsorsuutigisinnaavaa kisianni Chile, Kalaallit Nunaat aamma USA normu 2'nngorniarlutik unammissapput semifinalimut anngunniassagunik. Kalaallit Nunaata Argentina ajugaaffiginngisaannarsimavaa, Chilemut unamminernit tallimanit pingasoriarluni ajugaanikuuvoq. Kisitseqqissaarnerit ersersippaat USA'mut unamminissaq ajornarpallaarnavianngitsoq.
Gruppit aappaanni Brasilia ajugaassangatinneqarpoq. Semifinalimut anngunniutissangatinneqarlutik Uruguay aamma Dominikanske Republik.
Unammersuarnissani aggersuni holdit pitsaanerit pingasut VM'imut anngutissapput 2013 januaarimi Spaniami ingerlanneqartussanut.