Hans Egedep eqqaassutissaa aserorteriffigineqartoq
Hans Egedep eqqaassutissaa Nuutoqqamiittoq qalipaammik aappalaartumik kuerarneqarsimavoq "666" aamma allanneqarsimalluni
Godthåbimik tunngaviliisoq danski-norske palasi, ajoqersuiartortitaq nunasiaateqalersorlu Hans Egede, eqqaassutissaa Kalaallit Nunaanni amerlanernit ilisimaneqartoq annertuumik aserorteriffigineqarsimavoq.
Inuup ataatsip arlallilluunniit eqqaassutissamik qalipaammik aappalaaartumik kueraasimapput, Hans Egede allaajunnaarluni aammik kuuttuinnanngorsimasoq. Eqqaassutissap tunngaviani "666" angisuunngorlugu aappalaartumik qalipaaserlugu allanneqarsimavoq, aserorterineq kristumiussutsimik tunutsisunit suliarineqarsimasoq ilimanarsisillugu.
Sermitsiaq.AG ullaaq Nuummi politiit attaveqarfigaat kisianni pigaartut ittuat Henning Siezing, aserorterisimanermik ilisimasaqanngilaq.
- Tusagaqarnikuunngilagut, kisianni soorunami qisuariaateqassaagut nalunaarfigineqarutta, Hennig Siezing oqarpoq.
- Hans Egedep eqqaassutissaa siornatigut taama aserorteriffigineqarsimava?
- Uanga tamanna ilisimanngilara. Kisianni soorlu Københavnimi Qungussutariannguup eqqaassutissaata qungasia kipineqarnikuuvoq aamma qalipaammik kuerarneqarnikuuvoq - taamaammat tassunga eqqaanarpoq.
Ilisimaneqanngilaq qanga aserorterineq pisimanersoq.
Sermitsiaq.AG’p paasissutissaatai naapertorlugit Hans Egedep eqqaassutissaa arlaleriarluni aserorteriffigineqarsimavoq qalipaammik aappalaartumik kuerarneqarluni.
Wikipedia allappoq, uumasup kisitsisaa, 666, Johannesip Allagaanit aallaaveqarpoq, uumasoq kisitsisitaqarpoq aamma uumasup aqqa ilisarnaatitaqarpoq. Nalinginnaasumik kitsit 666 kristumiussutsimik tunutsisut ilisarnaataattut paasineqartarpoq - allaat immaqa satanisiortut ilisarnaataattut. Taamaattumik Hans Egede, Kalaallit Nunaata apostelia kristumiussutsimik eqqussisumut kisitsimmik allassimaneq attuumaratarsinnaavoq.
HAserorterisimaneq pillugu nalunngisaqaruit suulut@sermitsiaq.ag. allassinnaavutit.