- Inuuninni misigisaq ajornerpaaq

Ullumimiit sapaatillu akunnerini tulliuttuni Sermitsiaq.AG-mi oqaluttuat qiiaamminartut poorskikkunni AG-mi ilanngussat saqqummersittassavagut

Illustration: Sermitsiaq.AG

Aliortukkat, pisut nassuiaruminaatut, ufot allallu.

Oqaluttuanik nuannersumik, quilertanertunik, eqqumiitsunik tupinnartunillu ulikkaarpoq, tamakkulu ullumikkumiit AG-mi atuartartut AG-mi poorskikkunni ilanngussatsinneersut saqqummersittassavagut.

Oqlauttuaq ajugaasoq ”Igalaami tarraq” Pavia Møllerip allagaa uani saqqummersereersimavarput.

Maannakkut Peter Ernst Frederiksenip oqlauttuaa ”Taavaana malikkaatigut” saqqummersipparput.

Ataurluarisi!

"Inuuninni nuanniinerpaamik misigisamik oqaluttuutilaarniarpassi.

Tassa taamani eqqaamarpianngilara 1970-ikkut ingerlaneranni misigisaq inuuninni ajornerpaatut oqaatigisinnaasara.Oqaluttuarilaarniarpara ilissinnut, kinguaassinnut oqaluttuarisarniassavarsi puigoqqunagu.Inuusuttuaranngulerluni illoqarfimmi mikinerusuni ileqquusarpoq ullukkut unnulersumi aneerneq, aamma ilaanni unnukkut aneerneq pissanganartunik imminnut quilertasaareqatigiinneq pisarluni aneerujuutigaluni.Arlaat aallartittarpoq soorlu qimaariataartuusaarluni oqariitigaluni »Eeeq!« Aatsaat tupannartoq iliuuserinngisamik qimaariartarluni, tassami ilanngui kiinaat allanngortarpoq naakkinarsilluni allaallu qiangajassinnaasarlutik.Uagullu tamanna aqqusaariaripput, taamani eqqaamarpianngilara qassinik ukioqarlunga eqqaamavara suli atuartuullunga.

Immaqa apersortinnissama tungaani? Eqqaamavara sisamaalluta nukappiaannaalluta kammagiit qaninnerit atuaqatitsinni aneeqatigiippugut.Tassamiaasiit immitsinnut ersiortinniaqattaatileqaagut, unnoreersoq immaqa qaammat juulimi?

Ingerlaarujoorpugut aanersuit tungaannut taavalu sangulluta iliveqarfiup tungaanut, aqqutaani oqallattaannguaq tupassaartaalluta oqaluttuarujuutaa ersiummernartunik, immaqa ilai ilumuunngikkaluartut – asuki naluara.

Uangami imatut inuuninni ersinarsinnaasunik peqannginnama aliortukka allallu misigisat eqqumiissinnaasut pillugit.

Ingerlaarujoornitsinni nalunngilarput skuut qanoq ittut atoraanni illoqarfillu anoreqarpiarani silagissuaq ingerlaartilluni kisimik tusarsaasartut tumerpalaaq imaluunniit allorarpalaaq.

Taamanimi illoqarfipput tamannartaa qulleqanngilaq suli, tassa aanersuit tungaannut iliveqarfiullu tungaanut, illartarniarluta. Tupattarniarlutalu nuannisaruttorluta misigilerpugut ingerlanitsinni tumerpalunnani allatut nipilimmik ingerlasoqartoq.

Qerrr…sssh….qerrr…ssssh.. kaliusalluni ingerlasoqarmat, Kim-i oqarpallapoq »kinaana taamak ingerlasoq?« Jens, Jim uangalu tulleriilluta akivugut taamak ingerlasoqarata. TatatataaaH!

Immitsinnut qiviartaappugut ammuinnaq isigisarluta kina taamak ingerlasoq nipiliortitsilluni pasisaqattaannitsinni. Kiisa qiiaamminarsivoq, soorlumi nippakkaluttuinnarluni pisoq taanna nipi kalippaluusattorsuulluni ingerlasoq, qanilligaluttuinnartorlu.

Tamatta unippugut tusaaniarlugu kinaanersoq. Unillutalu nipaarulluni, ingerlalerlutalu nippaqqilluni.

Kiisa tamatta misiginngisatsinnik ingerlanerput sukkatsinnerulerpoq, aatsaallu iliveqarfik saneqqunneraniit qiteqqullugu ingerlalluta.

Aappassaanik unikkatta arlaat kamaasalluni oqarpoq »Kinaana!?« Soorunami ilumoorsaarluta tulleriilluta akivugut taamaasiornata. Taamaasisorlu Jens-i tunummut qiviarsimalluni pilerpoq: »Sunaana innga?«

Tamatta tunummut qiviaqqaartinnata oqarpugut: »Qraah! Piaarinak!« Uteriisaartukasiulluni oqaqqippoq: »Haaj! Sallinngilanga! Takeriarsiik!!«

Tamatta eqqumiigilerlugu pissusaa qiviaannarparput, tassami unilluta nakkussaa sunaanersoq isiginiarsarilerparput. Aarillimi. Allaanngilaq ujaqqatut isikkulik aqqusinermut ilisaq uagut timitsitut angitigisoq. Tamatta nakkutilerlugulu Jim oqarpoq: »Kingumut ingerlasa – saallugu«.

Aallaratta isigalugu taamak nipaqaraluanngilaq. Qiviarparput suli taaka iluseq uninngaannarpoq. Aanngaratsigu taarmik siumut saaqqippugut, pissangalluta nipissamik tusaasinnaasatsinnik. Soorlululuunniit uummaterput nammineq tusaasinnaanngungajallugu. Ingerlalersoratta pisunnerput sukkatsiimillugu, aarimmi nippaqqippoq taanna kalikalaarluni ingerlarpaluk; tamatumuuna sukkanerulluni qanilliartorpaluppoq. Qiiaamminarsilluni quilertanersuullu nalleruttoraatigut ataatsikkupajaaq qiviarparput, taavaana paarmortukasiulluni sunaanerpoq aggersukasik! AAAARGH!!! Taamallu silarsuaqaraluanngilagut.

Tataminnermik silaarutaasaannaq qimaarsuaarsimavugut, nilliaannaq. Silattulerpugut aatsaat oqaluffiup saavani seeqqummiinnarluta, anertikkartuinnaalluta tamattalu isikkuloqaluta. Tassa asuli ikasarneq timitarsinneqartarpoq ersisaartinnermik. Illillu atuaasoq misigisimaguit taamatut, unnukkut aneertillutit taarnersamut piguit eqqaamaniariuk tunumut qiviassagavit. EEEQ!"

AG’p poorskimi aviisia oqlauttuallu qiiaamminartut uani pisiarisinnaavatit:

Powered by Labrador CMS