Skip to main content

Parnaarussat erinarsoqatigiivi pissangallutik tikipput

Naak sivisuumik angalagaluartik parnaarussat erinarsoqatigiivi Kalaallit Nunaanni parnaarussanut allanut nipilersornerup nuannersuanik ingerlatsitseqqissinnaapput

Vridsløselille Statsfængselimi parnaarussat erinarsoqatigiivini takuneqarsinnaanngilaq marlunngornermi ullaakkut Danmarkip silaa nuannerpallaarsimanngitsoq. Qungujularrateqaat timmisartoqarfimmi kuffertitik atisanik oqortunik imallit nassarlugit takkukkamik. 

Jesper erinarsoqatigiinneersoq siullermik nuannerpallaanngitsumik oqaluttuassaqarpoq. Taanna aatsaat perngaamik ingiaqatigineqarani parnaarussivimmit anivoq. Kinaassutsimut ilisarnaatinik pappiaraateqanngilaq, taamaallaat parnaarussivimkit anisinnaanermut allagartaq nassarpaa politiinillu marlunnit ilagineqarluni anineq sungiusimanerullugu. Timmisartoqarfimmi tunniussiviup saavani kisimiilluni pisattaminik tunniussisussanngorluni. Nassuiaaqaartariaqarpoq arlaleriarlunilu telefonikkut siarnguttoqareermat Jesper ajornartorsiutini nassuiaatigaa taamalu parnaarussat erinarsoqatigiivinut ilaasortaanini uppernarsarlugu.

Ilami aamma ullut tamaasa erinarsoqatigiit Kalaallit Nunaattut ungasitsigisumut angalaneq sungiussimanngilaat. Suli tupigusunneq angineruvoq erinarsoqatigiit ullup qeqqata siorna Kangerlussuarmut seqinnareqisumut Danmarkimilu aasaanerasullu kiatsigingajattumut tikikkamik.   

Kangerlussuarmi timmisartumik kinguaattoortoqarnera pissutigalugu parnaarussat timigissatsiarsinnaapput soorlu qaqqamik qaqisinikkut. Parnaarussat erinarsoqatigiivini ilaasortat sungiusimavaat ineeqqami nikeriarfeqanngingajattumik issianeq. Tamaammat pinngortitami sumorsuaq kusanartorsuarmik isikkivilimmiinnerup kiffaanngissusermik misigisitsinera kiinnaanni ersarilluarput.

 

Erinarsoqatigiit kalaalertaannut immikkut misigisaq 
Erinarsoqatigiit kalaalersaat Lars, naalungiaalluni meerarsianngorsimasoq, 50'nik ukioqarluni perngaamik "angerlarpoq". Kangerlussuarmi najugallit ilaat naapissimavaa, qatanngutaata nalunngisaa, sunaaffa qatanngutaa ungasinngitsumi najugalik. Taanna aggersarneqarpoq qatanngutigiillu marluk ukiut 50'it ingerlaneranni aatsaat aappassaa naapipput. 

Nuummut tikinnerup kingunitsiaa parnaarussat erinarsoqatigiivi pineqaatissinneqarsimasut isertitsisarfiata saavani ilisaritinneqarput. Erinarsortartut aqutsisuat Louise Adrian, parnaarussat erinarsoqatigiivisa suunerat nassuiarluarpaa. Naapeqatigiinnermi parnaarussat erinarsortartui tusarnaartitsisarput aammali inissiisarfimmiittut amerlaqalutik takkussimasut ataatsikkut erinarsoqatigisarlugit. 

Tusarnaariat akornanni oqaloqatigiinnerup erseqqissarpaa, erinarsoqatigiit inissiisarfimmiittut immaqa inuunerannut pikkunaatsumut nuannaarnermik qiimanermillu tunniussinerat. 

- Maaniippugut qaratsasi annanniarlugit. Parnaarussiviup iluaniilluni nipilersorneq iluaqquterujussuuvoq inuuneq pitsaasumik isumaqalersissinnaammagu. Parnaarussivimmi pissutsit ajugaaffigineqarsinnaanngillat, kisianni imminut ajugaaffiginnittoqarsinnaavoq, Jesper erinarsoqatigiinneersoq oqarpoq. Erinarsoqatigiiliorniaritsi ingerlalluartumik. Pakatsissutiginavianngilarsi.

Erinarsoqatigiinnerup sakkortussusaa aammalu ersaattaattorpassuit naapertorlugit Nuummi pineqaatissinneqarsimasut inissiisarfiini erinarsoqatigiiliornissaq siunissaqarluarpasippoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER