Doris: Tusarnaartitsinissaq unitsinniarsimanngisaannarpara

"Duua Iluliarmioq" taalluni Doris Jakobsen, Siumut, allappoq tusarnaartitsineq unitsinniarsimanngisaannarlugu, ippassaq Sermitsiaq.AG'mi allaaserisatsinnut akissutitut

Siumut folketingimut ilaasortaatitaa, Doris Jakobsen. Assi: Mikkel M. Schøler

"Tusarnaartitsinissaq unitsinniarsimanngisaannarpara".

Taama qulequtserlugu Doris Jakobsen - imminut taalluni Duua Iluliarmioq - ippassaq allaaserisatta "Dorisip danskit tusarnaartitsinissaat unitsinniaraa" oqaaseqartarfiani allappoq.

Oqaaseqaat danskisut taamaallaat allataasoq kalaallisut ima nipeqarpoq:

" Sapaatip akunnerata siuliani allagaq ammasoq ilaatigut Magtens Korridorerinut nassiuppara, taakkua Greenpeacikkut Issittumi uuliasiornissaq - tassa Kalaallit Nunaanni - unitsinniarlugu suliniuteqarnerannut peqataanissartik akuersaarsimavaat.

Uannut pingaaruteqarpoq nipilersortartut tusarnaartitsinissaannut unissaanissamik nipeqannginnissaq, qulakkeerniarluguli ilisimassagaat politikkikkut anguniakkamut sorlermut peqataatinneqarnertik aamma Kalaallit Nunaannut qanoq sunniuteqassanersoq.

Taamaaliorpunga pissutigalugu isumaqarama, Danmarkimi folketingemut ilaasortanerup ilagigaa Kalaallit Nunaanni muterniusumi pissutsit annerpaamik paasissutissiissutiginissaat pingaaruteqartoq aamma inuunitsinni pissutsit atukkavut danskinullu suut sorsuutiginerlutigit erseqqissaatigalugit. Ilisarisimasama tamarmik isumaqatigiissutigaannga Danmarkimi inuit Kalaallit Nunaannik muteerniusumik ilisimasakippaallaartut.

Taamaattumik sulissutigerusuppara, puisit amiinik oqaluttuassaq uuliaatitsinni nangeqqinneqassanngitsoq - tassa filmiliaritittartut Brigit Bardotitut ittut imaluunniit tusaamasarsuit Poul Mc Cartnytut ittut tapersersortigalugit Greenpeacip suliniutaat ikiorserneqassanngitsut, taakkua innuttaasut aningaasarsiornissaannik siunissaannillu naapertuutinngitsumik eqquerujussuarsinnaammata.

Aamma tikkuarusuppara uagut politikkerertatta uuliasiornermi akissussaaffeqarnertik ilungersuutigissagaat, illuatungaani Greenpeace ingerlatsiviuvoq inatsisit unioqqutillugit suliniuteqartarluni nunarsuarmi sumiiffinni uagut inuuffitsinnik aqutsiniartutut pissusilersorluni.

Tusagassiortut ingasaassillutik qulequtsiusserusunnerannit kukkunikkut oqartinneqarpunga, soorluli tassa nipilersortartut saassullugit oqaaseqarsinnaatitaannerannik nipangersaasutut tusarnaartitsinissamillu unitsitsiniaasutut.

Tamatuma kingorna inuppaaluit suliniut pillugu nuanninngitsumik oqaaseqarput. Nuanniikkaluaqaaq naatsorsuutigaarami kikkut tamat Greenpeaceikkut puisinniarnermik akornusersuinerannik ilisimasaqarsimassasut? Uuliaaterput pillugu nutaamik "puisit pillugit oqaluttualiulerpugut"? Greenpeacikkut aningaasanik katersiniarlutik tapersersorneqarnerannit siunissarput aserorneqassava?.

Allakkanni nipilersortartut qinnuigaakka tamannarpiaq appilerunik eqqarsaatigeqqullugu. Suli taama isumaqarpunga. Sumi kikkunnullu appisimaarnissartik soorunami namminneq aalajangertussaavaat. Kisianni isumaqarpunga Greenpeacikkut allaffeqarfiata saniatigut ilisimatinneqartariaqartut Kalaallit Nunaanni uuliamik ujaasinermi susoqarnersoq guitaritik nippatsitsinnagit, sarfarmi atugassaat Nordsømi uuliaqarfinnit takkuttuummat, taakkuali Greenpeacikkunnit akerliuniarfigineqarneq ajorput, Doris Jakobsen allappoq.

Powered by Labrador CMS