Skip to main content

Sikunik aserorterut unitsippaat

Shell'ip sikunik aserorterisitsineranik akornusersuineq unippoq. Imaanik nakkutilliisut aamma politiit umiarsuarmik nakkutiginnipput umiarsuaq Danmarkip imartaaniinnerata nalaanni

Greenpeacep akornusersuiniartartuisa uuliasiorfissuarmut Shell'imut sikunillu aserorterummik Issittumi uuliasiortussanik aqqutissarsiuussisussamut akornusersuinini naammassivaa. - Akornusersuineq naammassivoq. Sikunik aserorterussuaq marloriarlugu Lollandip kujataani unitsipparput, Sune Scheller, Greenpeacemi attaveqaqatigiinnermik sulialik Ritzaumut oqarpoq.

Shell aasaq manna Issittumi uuliasiorluni ingerlatsissaaq. Kisianni Greenpeacep qillerinissat ernummatigai taamaattumik Shell akornusersorniarlugu iliuuseqarlutik. Sikunik aserorterut 16 meterinik takissusilik - Nordica - Finlandimit maajip aallaqqaataa aallarpoq. Kingorna pingasoriarluni Greenpeacemit akornusersorneqarpoq - Finlandimi, Sverigemi kingullermillu Danmarkimi.

- Akornusersuinernut atatillugu tigusaasoqanngilaq. Maannakkut sikusiut Storebæltikkut ingerlaarpoq. Kisianni Shell malittareqqissaarparput, Sune Scheller oqarpoq oqaatigiumanaguli sikusiummut allatut akornusersueqqissanerlutik.

Sakkutuut umiarsuaat aamma politiit Nordicap danskit imartaatigoornera tamaat nakkutilliissapput. Naatsorsuutigineqarpoq sikusiutip danskit imartaat arfiningornermi qaangersimassagaa. 

Sakkutuut imarsiortut Søværnets Operative Kommando (SOK) umiarsuarmik nakkutilliissummik malinnaapput, danskillu politiivi immikkut sungiusarsimasut tallimanngornemi ullaakkut umiarsuarmut timmisartuunneqarput.

- Maannakkut sikusiut eqqissiivilluta malinnaaffigissavarput imartatsinnik qimatsinissaa tikillugu, Anne Dorte Hoppe Søe, Sydsjællands aamma Lolland-Falsters Politiiannit oqaaseqartitaq oqarpoq.

Akornusersuiniartartut 14'it Danmarkimit, Tysklandimit, New Zealandimit aamma Sverigemit aallaavillit tallimanngornermi ullaakkut sikusiut danskit imartaaniittoq gummibådiminnik unitsippaat - umiarsuup saarpiaanut imaanut pissikaallutik.

Sapaatip akunnerata aallartinnerani - maajip aallaqqaataani - akornusersuisartut 20 Nordica ikkivigaat taanna Finlandimi Helsinkimi uninngasoq. Ullut marluk qaangiummata Sverigep eqqaani Ølandimi akornusersuisartut arfinillit umiarsuarmut qaqipput kingorna politiinit immikkut ilinniarsimasunit Karlskronami tigusarineqarlutik.

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER