S: Orsussap akitsornera aarlerinaq

Nunarsuaq tamakkerlugu uuliamik nioqqutissiat akiisa qaffanneri pissutigalugu KNI A/S - Polaroilip atuisunut tunisinermi akiutitani tigummiinnarsinnaajunnaarlugu akinik qaffaavoq liiterimut 58 ørenik.

Taama nukissiuteqarnermut pisortaq Peter Grønvold Samuelsen, KNI A/S – Polaroil akitsuinermut nassuiaavoq.

Atuaruttaaq: "Ikummatissat akii qaffaqqipput"

Maanna Siumumi politikkikkut oqaaseqartartoq Per Berthelsen saqqummerpoq naalakkersuisunik naammagittaalliuteqarluni.

- Ukiut pingasut matuma siornatigut Siumup siuttuunerata naggataata tungaani orsussaq 15 øremik akitsormmat, tamanna annertuumik nilliaatigineqarpoq. Tamatumali kingorna qaammatini kingullerni qulini orsussap qaffariaataa quleriaatinngorluni katillugit 1,68 kr-imik akitsorpoq, Per Berthelsen aallartippoq.

- Naalakkersuisut akitsuinerminni tunngavilersuutaanni ”nunarsuarmi akit qaffariarnerat” pisuutinneqarpoq, tamannali erseqqissumik nassuiaaserneqanngilaq.

Taamaattumik Siumut qisuariarpoq
- Utoqqatsissut taanna upperiinnarlugu akuersaaginnarsinnaavarput susoqanngitsuusaartitsillutalu. Tamannali Siumup marlunnik tunngaveqarluni attassinnaanngilaa.

- Siullermik maanna naalakkersuisooqatigiit kanngusuallannguaratik – sipaarniarnermut pilersaarutinut imaluunniit akinut qaffaanernut atatillugu - tamatuma ”naligiimmik tunngaveqartumik pisarnera” oqaatigiuarpaat, aappaattulli Siumup qisuaraiaataa orsussat akitsornerata pissutsinut allanut sunniuttarneranik patsiseqarpoq, tamannalu ulluinnarni oqimaatsorsiornerulernermik kinguneqartarpoq – minnerunngitsumik inuiaqatigiinni oqimaatsorsioreertortatsinnut sakkortunermik kinguneqartarluni.

- Ullumikkut ”oqimaaqatigiittumik” tunngaveqarnermik oqaaseqarneq asuli oqalunnerusoq kialuunniit paasisimasariaqalerpaa, tamannami inunnut ”pututitsiniarnerinnaavoq”, matumanimi inuit akunnattumik isertitaqartut akitsuinerni annertunerpaamik nammatassinneqartuarneri piviusup takutittarmagu, Per Berthelsen oqarpoq.

Pingaartumik nunaqarfiit eqqorneqassapput
- Nunaqarfiit qiviaannarutsigit petroliumik taamak annnertutigisumik akitsuineq ukiuunerani illup inuuniarnermut pisariaqaqisumik kiassartariaqarneranut qammammut 500,00 kruune-t sinnerlugit aningaasartuuteqarnerunermik kinguneqassaaq. Taamatut qaffaateqarnerup nassataanik ulluinnarni pisariaqartitat allallu aningaasartuuteqarfiusaqisut aamma akinik qaffaanerup sunnissavai. Akunnattumillu isertitaqartut taamatut qaffaaneq annertuumik aamma malugissavaat.

- Naak orsussap akia Danmarkimi akigitinneqartunit appasinnerugaluartoq oqarsinnaagaluarluta, eqqaamasariaqarparput inuiaqatigiiugatta danskinit bil-inik ingerlateqartunut sanilliulluta orsussamik allaanerujussuarmik atueriaaseqartut.

- Inuiaavugut immakkut annertuumik ingerlatsinermik tungaveqartut tamannalu kulturitsinnik attassiniarnitsinni ukiuuneranut peqqumaatinik katersinitsinnut atatillugu illoqarfiup avataanukarluta katersinitsinni attataraarput, taamaanngippammi illoqarfitsinni pituttaatutullusooq illuta ulluinnarni inuuneqassaagut. Taamaalilluta allat biilinik atuineranni uagut angallatinik atuivugut, angallatillu ungasissutsimut aalajangersimasumut ingerlaarnerminni orsussat quleriaammit 15-eriaammut annerusoq atortarpaat, Per Berthelsen tikkuaavoq.

Ikummatissap akia immikkut akileraarusersueqqinneq
- Siusinnerusukkut nammaqatigiinnermik periuseqarluni orsussap akianik aalajangersaasoqartarpoq, tamannalu assersuutigalugu naalakkersuinikkut aalisartortatsinnik illersuiniarluni orsussap akianik apparsimaarisitsinermik iliuuseqarneq inuiaqatigiit tamarmik iluaqutigisarpaat.

- Ullumikkut Naalakkersuisooqatigiit orsussap akia amigartoorutiminnut ”pikkoreqalutik” angusaminnut matussusiiniarnerminnut atatillugu akitsuutinik isaatitsiniarnermut ilanngullugu atulerpaat

- Aningaasaqarnermut atatillugu maanna naalakkersuisut aningaasanut inatsimmik saqqummiussinermi naatsorsuutit inernerinik kusanartitsiniarneq kisiat ukkillugu kingorna tassanngaannartumik inuiaqatigiinnut unneqqaserluttumik tunngavilersuillutik pipallannikkut immikkut aningaasaliissutinik aningaasalersuillutik iliuuseqartuarnertik atornagu, piviusorsiortumik tunngaveqarluni aningaasaqarnikkut sinaakkutit piviusorsiortut aalajangersimasut tunaartaralugit ingerlatsineq pitsaanerunnginnersoq Siumup tungaanit apeqqutigissavarput, taamaaliornermi inuiaqatigiit aningaasaqarnikkut isasooriartornerannut ingerlatsinertut isigigatsigu, Per Berthelsen oqarpoq.

- Ukiuni kingullerni ”oqimaaqatigiissumik” aningaasaqarnikkut ingerlatsinialersaarluni tusarnersumik nalunaarutip piviusumi 1 milliard kr-inik kiisalu 400 million kr-ningajannik amigartooruteqarnermik inerneqarnera takuarput.

- Tamanna ajorluinnarpoq.