Tele sinneqaruteqarluartoq

Tele Greenland 2012'imi akileraarutit suli akilernagit 71,1 million koruuninik sinneqartoorpoq. Aningaasaliiffissat nutaat pitsaanerillu pilersaarutaapput

Tele Greenland ukioq kingulleq angusarissaarpoq, akit appasissut piginnaasaq sukkatsinneq aamma aningaasaliiffiit nutaat. Assi : Leiff Josefsen

Tele Greenlandip ataatsimeersuarnerani maajip aappaani 2012 ingerlanneqartumi, pisortaagallartoq Steen Montgomery-Andersen ukiumut nalunaarummik saqqummiivoq, tassani takuneqarsinnaavoq akileraarutit ilanngaatiginagit sinneqartoorut 71,1 mio. koruuniusut.

Ataatsimeersuarnerup ukiumut nalunaarut aamma Kalaallit Nunaanni Namminersorlutik Oqartussat iluanaarutaat 32 mio. koruunit akuersissutigaa.

Siulersuisut siulittaasuata Agner N. Markip 2011’mut nalunaarutaani erserpoq ukioq Tele Greenlandimut angusarissaarfiusimasoq.

- Apriilip aallaqqaataa 2011 internettimik tuniniaanitsinni akit apparterujussuarpagut, Agner N. Mark oqarpoq, nangillunilu; ” Akinik appaanerput atuisutsinnit ilassilluarneqarpoq naak atuineruleraluarlutik aningaasarpassuarnik ileqqaaruteqarmata. Tele Greenlandimik atuineq annertusigaluartoq akit apparnerinit kaaviiaartitanit ukiumut 20 mio. koruunit missaat annaaneqarput.

Aningaasaliiffiit nutaat

Angusat pitsaasut nangitsigisaannik tunisassiat nutaaliat pitsaanerillu aningaasaliiffigineqassapput. Assersuutitut taaneqassaaq internettimut attaveqaatit angallattakkat 2010’mi tuniniarneqalersut, manna tikillugu inuit najugaqarfiisa 63 procentianni atorneqarsinnaalereermata. Inerisaaneq 2012’imi ingerlaqqissaaq illoqarfiit arfinillit taakkuninnga atuiffiusinnaalissallutik. Assersuutit aappaattut taaneqassaaq allakkerinermi imminut sullissiviit nutaat.

- 2011’mi angusat pitsaanerisa siullermik tunngavigerpiarpaat atuisut patajaatsut piumasaqartulli aamma ingerlatsiviup sulisuisa sulilluarnerat. Neriuppugut 2012’imi aningaasatigut tunngavissaarissaarluta pitsaasunik angusaqaqqissinnaassalluta, tamatuma saniatigut tunisassiat pitsanngorsaavigalugit saqqummersissinnaassallutigit kiisalu immikkoortut ilaanni aalajangersimasuni akinik appaasinnaassalluta, Agner N. Mark oqarpoq.

Powered by Labrador CMS