S: Sulisorisanut inissarititat suli naamik

- Ukiuni tulliuttuni Naalakkersuisut sulisorisanut inissiarititanik ikilisaaniarnerat maanna paasinarsivoq, tamatumani pineqartut pillugit ukiumut aningaasarpassuarnik 20 mio. kr-inik naleqartunik Namminersorlutik Oqartussat ataatsimoortumik inissiaataannut 1700 aningaasartuuteqartarneq pissutaalluni.

Siumup politikkikkut oqaaseqartartua Per Berthelsen, oqallisissiami matumani allappoq.

Tamannarpiaq kisiat isigalugu Naalakkersuisut oqariartuutaat isumaqatigikannerneqarsinnaagaluarpoq. Taamaattoq pissutsit ataatsimut qiviaraanni siunertarineqartoq eqqarsaatigilluagaarpasinnanilu piffissami suliassarpassuarnik amerlasuunik salliutinneqartariaqarlutillu paasiniagassaqarfiusumi taamatut oqallinneq pisariaqanngitsumik aalassassimaartitsivoq.

- Aningaasartuutimmi taaneqartut qiviaraanni, taakku inuiaqatigiinnut isertitsissutaasinnaasunut periarfissiinerannut sanilliullugu annikitsuaraannaapput, Per Berthelsen nalilersuivoq.

Nunatsinni pissutsit immikkuullarissut
- Atuumassuteqartut Qanoruumi ulloq 26. april 2012 oqaatigisaat aallaavigalugit Naalakkersuisut nunatsinnukarluni suliartornissamut pilerilersitsisinnaasunik piiaanerisigut sulisussatut pisariaqartinneqartut avataaneersut pissarsiarisinnaanissaat annertuumik akornuserneqassaaq.

- Sulimi ”nunatsinni pissutsit immikuullarissuunerat” qimarratigisinnaanngilarput, taamaammallu pissutsit aalajangersimasut nunani allani aaqqinneqartarnerannit allaanerusumik iliuuseqartariaqartarpugut. Maani inuiaqatigiit akornanni ilinniarsimasunik sulisussanik amigaateqaqaagut, taamaammallu suli avataanit sulisussatsinnik amerlaginarsinnaasunik pissarsiortariaqartassaagut. Avataani sulisussarsinitsinni nunaqqativut ilinniakkaminnik naammassinnillutik angerlartut sulisussariarisinnaagutsigit pitsaanerpaassaaq. Taakkumi nunatsinniiginnarnissaat naatsorsuutigisinnaavarput, Per Berthelsen allappoq.

Ikinnerpaamik ukiuni tallimani sulineq
- Ilinniakkaminnik naammassinneqqammersut kisiisa qiviarutsigit, taava taakku minnerpaamik ukiuni tallimani sulereerunik aatsaat ima aningaasarissaarsimatigilernissaat naatsorsuutigissavarput, aallaat namminneerlutik illusisinnaalersimassallutik. Taamaammat siunissami suli ukiuni arlalinni sulisitsisup inissiamik neqeroorutaa atorlugu taakku angerlartinnissaannut pilerisaaruteqarnissaq suli pisariaqartinneqarallartussaavoq.

- Matumani assersuutigalugu immikoortuni piffinniluunniit sulisorisanut inissiat atorneqarsinnaanerisa assersuutigalugu ukiunut tallimanut killilerlugit aaqqissuussisoqarsinnaanera misissorneqarsinnaavoq, tamatumalu kingorna inissiami ineqartut nammineq initaarlutilluunniit ineqarnerminnut tunngasoq allatut aaqqiivigissavaat.

- Aaqqissuussinermut tunngatillugu aningaasaliissutit qiviarutsigit, taava ukiumut aningaasartuutit 20 mio. kr-it missaanniittut matussusernissaannut tunngatillugu avataanit suliartortitat ikitsuinnaat atorlugit aningaasartuutit akileraarutitigut isertitsinikkut matussusernearsinnaanerat naatsorsorsinnaavarput.

Kisitassaq
- Sulisorisanut inissiamut atugassanngortinneqartumut ataatsimut 200.000 kr-init sinnerlugit akileraarutitigut isertinneqartussaanerat naatsorsuinikkut paasinearsinnaavoq. Taava avataaneertut 70-it 80-illu ”missaannaanni” amerlassusillit aningaasartuut matusinnaavaat.

- Taakkuli saniatigut utaqqiisaagallartumik ineqartitsinermut annikitsumik akiliisitsisaleraanni, taava avataanit suliartortitat suli ikinnerusut Namminersorlutik Oqartussat aningaasartuutaat matusinnaavaat.

- Tamatumalu saniatigut inissianik atugassanngortitsinitsinni amerlanertigut sulisinnaasut marluk pissarsiarinerisigut ”marloqiusamik aaqqiisarnerput” ilanngunneqarsinnaavoq, taamaalillunilu akileraarutitigut pissarsiat siuliani taasanit suli annertunerussallutik.

Suliassaqarfiit pingaarutillit allat
- Taamaammat sulisussanik avataaneersunik pissarsisarnissarput suli pisariaqartillugu, aaqqissuussineq atorlugu isertitanik amerlasuunik pissarsisarnerput pissutigalugu aaqqissuussineq aningaasaliinertut isigisarsiaqaripput Siumumi isumaqarpugut.

- Taamaammat pineqartumi sakkukillisaasinnaanerput eqqarsaaatigisariaqarparput, Per Berthelsen naqissusiivoq.

- Pineqartup maanna qaqilerlugu oqallisiginissaanut suli piffissanngitsoq Siumumit isumaqarpugut. Aaqqitassanik allanik siulliullugit aaqqinneqaqqaartariaqartunik amerlasuuniki suli saatassaqarpugut, Per Berthelsen allappoq.