Kuupik: Sulisartut ulluanni pilluaritsi

Naalakkersuisut siulittaasuata Kuupik Kleistip suliffeqarfiit suliffeqarfinnilu atugassarititaasut maajip aallaqqaataani oqalugiaammini eqqaavai

Naalakkersuisut siulittaasuat Kuupik Kleist. Assi: Arktis Media

- Siullermik nunatsinni nunanilu allani sulisartut qamannga pisumik pilluaqqorusuppakka.

Taama allappoq naalakkersuisut siulittaasuat Kuupik Kleist, Inuit Ataqatigiit, nunarsuarmi sumiiffinni amerlaqisuni sulisartut ulluat maajip aallaqqaataani ullorsiutigineqarneranut atatillugu.

Tamakkerlugu ilanngupparput;

"Siullermik nunatsinni nunanilu allani sulisartut qamannga pisumik pilluaqqorusuppakka.

Tamatta nuannaarutigisariaqarparput inuiaqatigiit pigissaariartorlutillu atugarissaariartormata. Ukiumut inummut isertitat amerliartuinnaratik arnat isertitaqqortusiartornerat tulluusimaarutiginerpaasassatta ilagaat. Suliffissaaleqinermik eqqugaasut amerlagaluartut ilisimavarput suliffiit aalaakkaasuusut

Suliffeqarfiit amerlanerit


Taamatut oqaaseqarsinnarlunga Naalakkersuisut politikkiat erseqqissassavara. Suliffissat nutaat pilersinneqarnissaat pingaartitarilluinnarparput, tassuunalu suliffissaaleqinerup akiorneqarnissaa. Siorna aallartittumik suliffissaaleqisut piginnaanngorsarnerannut aningaasaliissutigisimasavut ukiuni tulliuttuni malunnartumik amerlisarusuppagut.

Tulliullugu erseqqissaatigissavara pingaartittuarsinnaratsigu innuttaasut qanimut peqatigalugit inuiaqatigiit aaqqissugaanerannik aaqqissuusseqqinneq aallartikkatsigu. Tassunga atatillugu qamannga pisumik nuannaarutigaara sulinermik inuutissarsiuteqartut kattuffii assigiinngitsut pingasoqiusaasumik isumaqatiginninniarnernik taaneqartartunik peqatiserigatsigit.

Tamatta akisussaaqataanitsinnik ullaaq Jess G. Berthelsenip raatiukkut oqaasia arajutsinngilara, tamanna pillugu matumuuna sulisartut tamaasa kaammattorusuppakka ukiuni makkunani aalajangiisuusuni kivitseqataaniaqqullugit.

Ukiuni 33'ni namminersornerulluni oqartussaaneq


Nunatsinni sulisartut illersugaanerat pillugu inatsit 1972-imi atuutilerpoq, tassa ukiut 40 matuma siorna. Sulisartut illersugaanerannut tunngasoq nalitsinni nutaamik aalajangiiffigisassarilerparput, taamaasiorniarpugullu ukiuni makkunani aatsitassarsiornerit arlallit ammaakkusukkatsigit.

Naalakkersuisut sinnerlugit nuannaarutigaara SIK Sulisitsisullu ataatsimik nipilimmik nalunaaruteqartarmata nunami maani inuussutissarsiornermut suliassat angisoorsuit piviusunngortinniarneqarneranni inooqataanermi appasinnerusutut inissisimatitsinissaq illersorsinnaanagu, soorlu aamma tamanna Naalakkersuisut illersunngikkat. Tamanna pillugu SIK immikkut qutsavigerusuppara nunarsuaq tamakkerlugulusooq sulisartoqarnerup iluani sapiiserluni aqqutissiuussinera pillugu.

Naggataatigut inuiaat kalaallit namminersornerulernerup eqqunneqarneranit ukiunik 33-nik nalliuttorsiornitsinnik qamannga pisumik pilluaqqorusuppakka. Taamanernit sorparpassuit allanngoqaat, kisianni tassa meeqqat inuusuttullu nutaat maanna alliartorput peroriartorlutillu. Siunissaq qaamasoq ataatsimoorluta pilersissavarput."

Powered by Labrador CMS