Skip to main content

Assiisivik: Naggataarneq nuannerluinnartoq

Kalaallit Nunaanni filmiliat pillugit Berlinimi filmfestival ataasinngornermi unnukkut naggataarnersiorneqarpoq. Asserpassuit takukkit

Franskit kalaallillu filmiliaat "Inuk" takutinneqareermat Nivi Nielsen Berlinimi Greenland Eyes International Filmfestivali naggaserlugu nuannerluinnartumik tusarnaartitsivoq.

Nive Nielsen nuannisartitseqaaq
Nive Nielsen and the Deer Children filmfestivali naggaserlugu nuannerluinnartumik tusarnaartitsivoq. Nive nipilersorlunilu erinarsorpoq immaqa aatsaat taama tusarnaartitsilluartigaluni. Nivep "aammaloorutigaa" erinaq suli saqqummersinneqarsimanngitsoq "Wrong", inuillu nuannarisassinneqarput. Nive cd'liaa Tysklandimi saqqummeqqammivoq, nipilersukkat tyskinit nuannarineqarsinnaalluarunarput.  

Aamma atuaruk "Tumit nutaat pilersinneqarput"

Nunatsinni filmiliornermik tunisassiorneq nutaaq
- Ukiuni makkunani Kalaallit Nunaanni filmiliorneq sanaartorneq malinnaaffigaarput, tamanna siornatigut takusimanngilarput, festivalenip pisortaa Lill-Ann Körber Sermitsiaq.AG'mut oqarpoq. 

Tamannarpiaq tunngavigalugu festivalimik aaqqissuussineq piviusulersaarutitut filmiliarineqarpoq. Festivalip ingerlanerani Ivalo Frank qaaqqusisuusoq islandimioq assiliisartoq Einar Snorri ilitsersortarpaa, sapaatip akunnerani qaangiuttumi nal. akunnerpassui filmiliortoq. 

Danskit tusagassiiviisa soqutiginninnerat annikippoq 
- Festivalimi Kalaallit Nunaat pillugu paasissutissiinermik nutaamik takutitaqarusuppugut aamma Kalaallit Nunaannik isiginninnerup nutarterneqarnissaanut peqataarusuppugut, tamanna anguarput naatsorsuutigisatsinnit pitsaanermik, Ivalo Frank qasoqqasoq naammagisimaarinnilluartorli oqarpoq. 

Tysklandimi Greenland Eyes Filmfestivali soqutigineqarluarpoq. Illuatungaani danskit tusagassiiviisa festivali nipeqannguaratik qaanngiinnarpaat, naak Danmarkimit malinnaaffigineqarnissaanik isumaqatigiissusiortoqarsimagaluartoq. 

Namminersornerunerup qitornai aallartipput

Filmini, filmiliornermik ingerlatsisuni aamma oqallinnerni ersarippoq namminersornerulluta oqartussaaffeqarnitta nalaani inunngortut G60'p qitornaasa suliaat taarseriartuleraat. Inuusuttut namminersornerulluta oqartussaaffeqarnitta aamma namminersornitta nalaani peroriartortunut oqaluttuarisaaneq nunasiaanermit imminut paasinermut tunngaveqanngilaq soorlu angajoqqaavisa tamanna misigisimagaat. 

- Maluginiarparput inuusuttut soorunami assersuutigalugu Qullissat 1972'imi matuneqarnerat pillugu isumaqartut, kisianni taakkununnga oqaluttuarisaanermi pisut allat ilaannaraat. Taakkua allanik sammisaqarput namminneq isiginiakkaminnik, Karen Marie Nathansen, filmfestivalimi peqataasoq oqarpoq.

 

Filmfestivali nuttassaaq
Berlinimi filmfestivalimik aallarniisut aammaaqqikkusupput tamatumuunali Berlinimiunngitsoq. 

- Kalaallit filmiliaat pillugu nutaanik oqaluttuassanik ulikkaarpoq isumaqarpugut aamma Kalaallit Nunaannik saqqumilaarsitsinerusoq pitsak, ukiunilu aggersuni festivali allani ingerlanneqarsinnaassasoq, Greenland Eyes 2012, pisortai Ivalo Frank aamma Lill-Ann Körber oqaluttuarput.

Suliniutigaat Det Danske Filminstitut isumaqatigiissuteqarfiginissaat, kalaallit filmiliaannik aaqqissuussineq una Danmarkimi ingerlanneqarnissaa anguniarlugu. Det Danske Filminstitut kingullertigut siunnersuummut soqutiginnittorujussuanngorput. Aammattaaq Katuaq oqaloqatigalugu aallartinnikuupput festivalip Kalaallit Nunaanni ingerlanneqarsinnaanera anguniarlugu.  

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER