Alluitsup Paani oqaluffik nutaaq atoqqaartinneqassaaq
Nunaqarfimmi oqaluffitoqaq 2008-mi ukiutoqqami ikuallappoq
Alluitsup Paani sapaatiuppat qulinut biskop Sofie Petersen kujataatalu provstia Dorthe Petersen naalagiartitsissapput nunaqarfimmi oqaluffeqaqqilernera malunnartinniarlugu.
Alluitsup Paani oqaluffitoqaq 1926-mi sananeqartoq ukiutoqqami 2008-mi ikuallappoq. Oqaluffitoqqap nappaqqinneqarnissaa ilagiit kissaatiginngilaat, illussanillu titartaasartut Kitaa Arkitekterne oqaluffimmik nutaaliaasumik 200 kvadratmeteriusumik titartaasimapput.
Alluitsup Paa Nanortallip palaseqarfianut atavoq Kujataani provsteqarfimmut ilaasumi. Nunaqarfik 1979-mi namminersornerulernerup eqqunneqarnerani 607-inik inoqarpoq, ullumikkullu 278-inik inoqarluni.
Ikuallanneq
Alluitsup Paani oqaluffik ukiutoqqami 2008-mi ikuallappoq, ikuallannerlu pillugu Nanortalimmi qatserisarfiup pisortaa Peter Mathiassen Sermitsiaq.AG-mit oqaloqatigaarput:
– Oqaluffiup isaariaata qulaani napasuliaqarpoq qanga oqaluffiup siarngi tassaniillutik. Oqaluffiulli saniani siarngit imikkoorlutik inissinneqarmata putut matuneqarsimanngillat. Napasuliami imaqangnitsumi qummoroortartut ilaat pulasimassaaq, kiffiaatillu 1926-meersut qummoroortartumit ikinneqarsimassapput, Nanortalimmi qatserisarfiup pisortaa Peter Mathiassen oqarpoq.
Alluitsup Paani qatserisartut ukiutoqqap unnuaani qamisaagaluarput, oqaluffillu nungulluni ikuallapoq toqqavia kisimi atalluni: - Qatserineq ajunngitsumik ingerlanneraqaluarpoq. Sakkortuumilli anorlerpoq issillunilu, taamaalilluni maqitsissut piffissap elaani qerrulluni, Peter Mathiassen oqarpoq.
Ukiutoqqami naalagiarneq tassaavoq oqaluffitoqqami naalagiarneq kingullerpaaq, ukiortaamilu naalagiarneq utoqqaat illuani ingerlanneqarpoq. Kunngit pingasuni amerlasuut naalagiarnissaat ilimagineqarmat nunaqarfimmi naalagiarneq minihalimi ingerlanneqarpoq.
Kulturikkut eriagisassaq
Peqatigiiffiup Alluitsup Paata ikinngutai ikuallanneq pillugu allapput:
– Ukiutoqqami isseqaaq, 14-inik issilluni sakkortuumillu avannerluni. Ikuallanneq unnuap qeqqanut qiteqquttor paasineqarpoq, qatserisartullu sapinngisartik tamaat qatseriniaraluartut oqlauffik annaanneqarsinnaanngilaq, ingammik anorleqalunilu isseqimmat, oqaluffimmi tamarmi qisuuvoq. Oqaluffiup saniani toqusut inaat aamma nungulluni ikuallappoq.
Oqaluffik nunatsinni kulturikkut eriagisasat ilagaat 1926-mi sananeqarluni, nunaqarfiup angissusaanut naleqqiullugu angeqaluni initoqalunilu 275-inut inissaqarluni. Pattagiaq quli pisoqaaneraaq tassalu 1847-meersuulluni I.P. Gregersenimit sanaajulluni.