Skip to main content

Puisit amii Magasinimi tuniniaqqusaajunnaarput

Inerteqquteqalernerup takutippaa inerteqqutip inuiannut inunnut atuutsinneqannginnera iluaqutaanngitsoq, Inuit Ataqatigiinniit Sara Olsvig isumaqarpoq

Tuluit Nunaannit sunniiniarluni suliaqarneq nunatsinnik eqqueqqippoq. Siullermik Tuluit Nunaanni avatangiisinik illersuiniaqatigiit Kalaallit Nunaanni uuliamik ujaasilluni qillerinit unitsinniarpaat. 

Maannakkullu Tuluit Nunaanni uumasunik illersuiniaqatigiit pimoorussillutik sulinerat piniartunik kalaallinik eqquivoq. 

Taama kalaallit piniartut isumaqarput, ullumikkut tusagassiuutitigut nalunaarummi inerteqquteqarneq "paasinerluilluni avatangiisinik illersuiniarpallaarnermik" taallugu: 

Niuertarfissuarmimi Magasin Du Nordimi tulunnit pigineqartumi maajip aallaqqaataani uumasut nujuartat amiinik atisalianik tuniniaasoqaqqusaajunnaassaaq.  

Læs også "Få danskere kender inuit-undtagelsen"

Læs også "Fangerne demonstrerer i København"

- Attartottutta ilaat Kalaallit Nunaanni piujuartitsinermik avatangiisinullu illersuinermik tunngaveqarluni puisit amiinit tunisassianik tuniniaarusuppat, suliaq Londonimi qullersaqarfitsinnut ingerlateqqissavarput, Jan Helleskov nalunaarpoq, oqarlunilu kalaallit piniartut ajornartorsioreeqisut ajoquserniarnagit. 

- Puisit amiinik tunisassianit piumasoqanngilaq, qanga qallunaanit pigineqarsimasumi niuertarfissuarmi 2009-mi tulunnut tunineqarsimasumi attaveqarnermut psiortaq erseqqissaavoq. 

- Nunarsuarmi tamarmi niuertarfitsinni uumasut nujuartat amiinik tunisassianik tuniniaanngilagut, taamaallaalli nersussuit, savat, savaaqqat savaasallu amii tuniniarpavut, Jan Helleskov oqarpoq.

Inunnut atuutitsinnginneq iluaqutaanngilaq 
Sara Olsvig Inuit Ataqatigiinniit Folketingimut ilaasortaq isumaqarpoq qallunaat ilami EU tamarmi annikippallaamik EU-p nammineq peqqussusiaani inunnut atuutitsinnginnermik ilisimasaqanngippallaartut, taannami tunngavigalugu kalaallit piniartut puisit amiinik tunisassianik EU-mi tuniniaasinnaapput.  

- Danmarkimi niuertarfissuup toqqaannartumik puisit amiinik tunisassianik tuniniaaqqusinnginnera ersarissumik takussutissaavoq inerteqquteqarnerup inuiannut inunnut atuutinneqannginera iluaqutaanngitsoq. Taamaattumik atuutitsinnginneq nunatsinnilu pissutsit maluginiaqquneqartariaqarput, Sara Olsvig ullumi Sermitsiaq.AG-mut oqarpoq.

Sara Olsvig taamatut isumaqarnera misissuititsinermi nutaami uppernarsineqarpoq. Misissueqqissaartitsisarfik Userseeds naapertorlugu qallunaat quliugaangata taamaallaat marluk EU-p immikkut peqqussutaanik ilisimasaqartarput. 

- Europami atuisunut narrutuunut puisit amiinik tunisassianik pilerisaarinissamut tunisassiornissamullu annertuumik suliassaqarpugut, niuertarfiilli amernalerujartortut "uumasunut ileqqorissaarnermik" tunngaveqarlutik amernik tamanik tuniniaanermik mattussippata angusaqangaarnavianngilagut. Tassani nunatsinni pissutsit pillugit paaisisitsiniaasariaqarpugut, paasitsiniaanerlu taanna isumaqarpunga ataatsimoorluta suliarisariaqaripput, Sara Olsvig oqarpoq.

Maajip aallaqqaataani akerliussutsimik takutitsineq
Paasisitsiniaanermut ”Piniartut tapersersortigimut” ilanngullugu nunatsinnit tamarmit puisinniat aqqaneq marluk 1983-imi aallaqqaammut Danmarkimi maajip aallaqqaataani ingerlatsisoqarmalli Københavnimi akerliussutsimik takutitsinissaarsuarmut peqataassapput. Tassunga atatillugu Sara Olsvig Kongens Nytorvimi Magasinip saavani oqalugiassaaq.  

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER