Skip to main content

Timmisartut unammillernerat nunatsinnut iluqutaavoq

Per Berthelsen Siumumeersoq toqqaannartumik Air Greenlandimut apeqquteqaqquneqarpoq, paragraf 37 naapertorlugu apeqqummini paaserisukkamiuk Air Icelandimip nunatsinni timmisartuussinerujartornera qanoq iliuuseqarfiginiarneqarnersoq 

Air Icelandip nunatsinni timmisartuussisarnerata ilaatigut kinguneraa Air Icelandip tuniniaavimmi siuariarnera Air Greenlandimut kinguariaataanera. 

Taama siumumiit Per Berthelsen naliliivoq paragraf 37 naapertorlugu apeqquteqarnermini tunngavilersoramiuk aperalunilu Air Icelandip timmisartuussinerujartornera naalakkersuisut qanoq iliuuseqarfiginiarneraat. 

Ineqarnermut, attaveqarnermut angallannermullu naalakkersuisoq Jens B. Frederiksen apeqqummut Per Berthelsenimut qujavoq, itisiliinerusumilli akissutisinissani kissaatigiguniuk Air Greenlandimut toqqaannertumik apereqquneqarluni:  

- Air Greenlandip niuernermini periusissai naalakkersuisunit akisussaaffgineqanngillat, Jens B. Frederiksen oqarpoq.

- Tamaaattumik apeqqutit tamakkiinerusumik akisinnaavara, itinerusumillu paasisaqarusukkuit Air Greenlandimut innersuppagit.

Per Berthelsenip apeqqutaa Jens B. Frederiksenillu akissutai imaapput:

1. Air Icelandip nunatsinnut nunatsinniillu upernaamut timmisartuussisarnini amerlippagit, qanoq Air Greenlandimut aningaasaqarnikkut kinguneqassava?

- Naalakkersuisut eqqumaffigaat assersuutigalugu Air Icelandip unammillernerujartornera aningaasatigut Air Greenlandimut pitsaanngitsumik kinguneqarsinnaasoq kaaviiaartitsinermik annaasaqarsinnaagami. Tamanna suliffeqarfiup suliaasa annikillisaavigineqarneranik kinguneqarsinnaavoq taamaalillunilu aamma suliffissanut isertitanullu.

- Naalakkersuisulli isumaqarput maannamut Air Greenland naleqqussartuartarnermigut aningaasatigut patajaatsumik ingerlaannarsinnaasoq niuerfimmi atugassaritaasut allanngoraluartut. 

2. Air Icelandip timmisartuussisarnini amerlineratigut Air Greenlandimut aningaasaqarnikkut kingunipilutitsissappat, qanoq Air Greenlandip aningaasakkut qaaviaartitani matussusissavai?

- Air Greenlandip kaaviiaartitsinermini tunngavigaa aqqutit kiffartuussinermut isumaqatigiissuteqarfiusut kiisalu aqqutit attartortitsinerillu niuernermik tunngaveqartut il.il. Aamma ukiuni kingullerni aqqutini ataasiakkaani niuernerpalaartumik ingerlanneqartuni unammillernerujartortoqarpoq, taamaakkaluartorli suliassaqarnerat annertusiartuinnarsimavoq ilaatigut aatsitassarsiortunit.  

-  Naalakkersuisulli isumaqarput maannamut Air Greenland naleqqussartuartarnermigut aningaasatigut patajaatsumik ingerlaannarsinnaasoq niuerfimmi atugassaritaasut allanngoraluartut. Air Greenland qanorpiaq iliorluni annaasaqarnerminnut matussusiiniassanersoq tamanna suliffeqarfiup nammineq aalajangissavaa.

3. Air Greenlandip timmisartuussisarneri annikinnerulerpata ilutigisaanillu qaaviaartitai apparpata, nunatsinni angalasunut piffissaq sivikinnerusoq sivisunerusorlu eqqarsaatigalugu qanoq kinguneqassava?

- Naalakkersuisut isumaqarput Air Icelandip nunatsinni suliassaqarnerujartornera nunatsinnut nunatsiniillu angalasunut iluaqutaassasoq, aqqutit amerlanerulerlutik, akulikinnerulerlutik akillu apparlutik. Naalakkersuisulli eqqummaariffigaat unammillernerujartorneq nunatsinni angalasunut sunniuteqarnerlussinnaasoq. Ullumikkut Air Greenland nunatta iluani aningaasatigut akilersinnaassutsimikkut assigiinngisitaartuni timmisartuussisarpoq,  Jens B. Frederiksen Per Berthelsenimut akivoq. 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER