Tikisitat nivattuusarnerat Siumup tupigusuutigigaa

Kalaallit ima eqiasutsigalutillu imerajutsigippat allaat suliffimmik nalinginnaasumik paarsisinnaanatik, imaluunniit Thailandimiut sulisorissallugit ima akikitsigigippat piumassuseqartigalutillu, allaat sulisitsisunit naggatissaa tikillugu atornerlunneqartarlutik?

Inatsisartut marlunngornermi ualikkut immikkoortitsiniarnermik ajornakusoortumik ajornartorsiuteqalerput sulisitsisut sulisussanik avataaneersunik tikisitsisinnaalersinnagit kommunini suliffissarsiuussisarfiit nunaqavissunik sulisussarsiortarneranni piffissaliussamik ullunit 14-init qaammammut ataatsimut sivitsuinissaat Inuit Ataqatigiinnit Siumumillu siunnersuutigineqarmat.

Læs også: "Bedre tid til at finde lokal arbejdskraft"

Inuit Ataqatigiinneersoq Peter Lyberth imminut isornartorsiornissamut piareersimavoq: – Kalaallit Nunaanni sulisartorpassuit ingerlalluartumik tutsuiginartumillu sulisorineqarput, kisianni suliumassusermik annerusumik suliffimmut tunniusimanerunermik takutitsinerusinnaasunik akornatsinniittoqarnera aamma nassuerutigisariaqarparput.

Aammali mianersorpoq: - sulisitsisut nunaqavissunut taarsiullugu avataaneersunik atorfinitsitserusunnerusarnerat ulluinnarni erseqqippallaaqaaq. Isornartorsiorneqartulli tassaanngillat sulisartut avataaneersut, aalajaatsugut tunniusimasutullu isigineqartut, kisiannili tassaallutik sulisitsisut, avataaneersut salliutillugit nunaqavissunik avaqqutaarisartut.

Nivattut nunanit allaneersut
Siumumeersoq Aleqa Hammond imminut isornartorsiornissamut aamma piareersimavoq: – Inuiaat kalaallit namminneq nunaminni inuit avataaneersut naligalugit pissusilersortarnissaat ittoorlutillu tunuarsimaannginnissaat pingaartuuvoq. Kalaallit ullaakkut makinnissamut piginnaaneqannginnerannik oqarneq ilumoorsimassappat taava ajornartorsiutit tamakku qaangerniarlugit suliniuteqarnerusariaqarpugut.

Aleqa Hammondilli allatut isikkullit kisittarsimavai: – Eqqiaasut namminersorlutik oqartussat illuutaanni eqqiaasuusartut nunanit allaneersuupput, igalaakkullu silammut qiviaraangatta nunanit allaneersut nivattut takusarpavut. Tamatuma pisariaqarnera ilumoorsinnaanngilaq.

Krissiep isumaliutersuutaa
Demokratineersup Anda Uldumip Sermitsiaq aamma atuartarpaa, tassanimi marsip 16-iani isumaliutersuut ”Sulisut nunanit allaneersut – tunissutit?” ilanngunneqarpoq, neriniartarfiutillip Krissie Berthelsen Winbergip kalaallinik Filippinerimiunillu sulisartunik misilittakkaminik nuanniitsunik nuannersunillu oqaluttuarfigisaa.

Anda Uldum isumaliutersuummit issuaavoq: ”Neriniartarfiutitta aappaani immaqa inuit 100-t missaanniittut sulisorinikuuagut, taakkunanngalu inuit quliugaangata marluk suliffimminnik paarsisinnaasarput. Naatsorsueqqissaarneq alianartoq”.

Sulisussat nunaqavissut Kalaallit Nunaanni sulinissamut salliutinneqarnissaannik sulisitsisullu sulisusanik immikkut piginnaasalinnik amigaateqartillutik pinasuartumik iliuuseqarnissamut periarfissaasa akornanni oqimaaqatigiissusermik pilersitsinissarput Anda Uldum aalajangiisuusutut isumaqarfigaa.

Sulisitsisut Kalaallit Nunaata avataaneersunik sulisussarsiornissamut akuerineqartinnagit sulisussanik nunaqavissunik pissarsiornissamut najukkani suliffissarsiuussisarfiit piffissaqartitaanerunissaannik siunnersuut amerlanerussuteqarluni taperserneqarluni Inuussutissarsiornermut Ataatsimiititaliamut ingerlateqqinneqarpoq.

Naggasiutitut oqaaseqaat
Inuit Ataqatigiit siunnersuummut tunngavilersuutaa Sermitsiaq.AG-mit allaaserisami issuarneqarpoq: – illoqarfinni annerni takulertornartoq tassavoq sulisussanik avataaneersunik tikisitsiuarneq – pingaartumik sanaartornerup, eqqiaasitsisarnerup, akunnittarfeqarnerup neriniartarfeqarnerullu iluani, uffa atorfiit tamakku nunaqavissunik kivinneqarsinnaassasut takorloornaraluartoq.

Tamanna Uummannami akunnittarfiutillip Arne Niemannip nittartakkami oqaaseqarfigaa: – Takulertornartoq tassaavoq sulisussanik avataaneersunik najuuttoqarnera - pingaartumik namminersorlutik oqartussat kommunillu iluanni - uffa atorfiit tamakku nunaqavissunik kivinneqarsinnaassasut takorloornaraluartoq. Silarsuaq kuniguk!