NunaMinerals kuultisiulerpoq

Canadamiu Kalaallit Nunaanni aatsitassarsioqatigiiffiup siulersuisuinut siulittaasunngorpoq

Pisortaq Ole Christiansen Nuup Kangerluani Qeqertarsuarmi, NunaMineralsip juulimi kuultisiorfigisassaani. Ass.:/Foto: Sermitsiaq

Kalaallit Nunaanni aatsitassarsioqatigiiffik NunaMinerals marlunngornermi juunip tallimaani Kujataani kuultisiulissaaq, ukiullu ingerlanerani suliffeqarfiup ujarassiuui Kitaa atuarlugu avannarpartissapput Avanersuarmilu Inglefield Land naggataatigut uniffigissallugu.

Nuummi marlunngornermi ualikkut ataatsimeersuartoqarnerani ukiumut misissueqqissaariffiusussamut 18 millioner koruuninik akeqartussamut aatsitassarsioqatigiiffik akuerineqarpoq. Qillerinermik suliniutissat sisamat ujarassiuut suliassaanni allassimapput: Juunimi Kujataani Uunartup eqqaani kuultisiorneq, juulip aallartinnerani Nuup Kangerluani Qeqertarsuarmi Qussummilu kuultisiorneq, juulillu naalernerani Qaanaap avannaani Inglefield Landimi kanngussammik, nikkelimik, zinkimi, sølvimik kuultimillu ujaasineq.

Uunartup eqqaani Vagarimi kuultisiornissamut NunaMinerals qillerivimmik attartussaaq qillerinermi pilersaarutit annertuut siorna Kujataani aputeqarnerujussuata kinguneranik taamaatitsisoqarneranik aamma angummanniarfiusussat naammassisinnaajumallugit. Nuup kangerluani Inglefield Landimilu ujarassiuut nunap qaavani misissugassanik arlalissuarnik misissuissapput.

Nunani allani aningaasanik niuerfimmi
NunaMinerals piginneqataasunit angisuunit pingasunit pigineqarpoq: Namminersorlutik Oqartussat (30,6 procent), Professionel Forening Ld Hf (16,8 procent) aamma Nykredit Bank (9,7 procent) kiisalu piginneqataassutinik ataasiakkaanik pigisallit 2.241-t.

Aatsitassarsioqatigiiffiup piginneqataassuta marlunngornermi ualikkut Københavnimi aningaasanik nalilinnik niueruteqartarfimmi kurs 170-imik naleqarput kaaviiaartitalli 680 koruuniinnaallutik – allatut oqaatigalugu ulloq taanna piginneqataassutit sisamaannaat niuerutigineqarput. 2011-mi piginneqataassutit 20 millioner koruuninik nalillit niuerutigineqarput.

Piginneqataassutit niuerutigineqarnerunissaat NunaMineralsip kissaatigaa, taamaattumillu ukiap ingerlanerani nunat tamalaat akornani aningaasanik nalilinnik niueruteqartarfimmi nalunaarsorneqarnissamik qinnuteqassalluni - immaqa Londonimi Torontomiluunniit, aatsitassarsioqatigiiffippassuit nalunaarsorneqarfigisimasaanni. Taama pisoqassaaq naalagaaffeqatigiiffiup mikivallaarnera aatsitassarsiornerullu iluani pissutsinut immikkuullarissunut ilisimasakippallaarnera nassuerutigalugu.

Ullumi ataatsimeersuartoqarnerani nunat tamalaat akornannut appakaannerunissamut siulersuisut piareersareerput. Telep pisortarisimasaa Anton Christoffersen 2007-imiilli siulersuisunut siulittaasuusimasoq tunuaamivoq siulittaasullu tulliatut ingerlaqqissalluni.

Siulittaasutut nutaatut Canadamiu Birks Bovaird qinerneqarpoq. Taanna suliffeqarfiup uranisiortup USA-milu Coloradomi aatsitassarsiorfimmik ingerlataqartup Energy Fuels Inc.-ip siulersuisuinut siulittaasuuvoq kiisalu Noble Minerals Explorationimi, Energy Fuels Inc. assigalugu Torontomi aningaasanik nalilinnik niueruteqartarfimmi nalunaarsugaasumi, siulersuisunut ilaasortaalluni.

Siulittaasup Birks Bovairdip siulittaasullu tulliata Anton Christoffersenip saniatigut siulersuisunut ilaasortat tassaapput Hans Kristian Olsen, Henning Skovlund Pedersen aamma Edward Slowey.

Powered by Labrador CMS