Skip to main content

Timmisartoq ingerlaarnermini ajornartorsiulersoq

Timmisartoq Dash 8, nal. 12.30 Kangerlussuarmiit Nuuliarluni aallartoq, tingereerluni ajornartorsiulerpoq. Sermitsiaq.AG timmisartumut ilaavoq

- Nassuerutigissavara: Tamanna nalinginnaanngilaq.

Taama eqqissisimasumik nipilimmik ilaasunulli timmisartornissamut annilaangasartunut nuanniitsumik oqartoqarpoq, Kangerlussuarmiit Nuup tungaanut timmisartoq ingerlaassalluni minutsialunni timmereersorlu arlaannik ajortoqarnera timmisartumik ingerlatitsisup paasimmagu.

Ajornartorsiut ilaasut timmisartup saamiatungaani issiasut tamarmik imaaliallaannaq takusinnaavaat. Ammartartoq milernermi assakaasut siaarneqaraangata ammartartoq matujumanngilaq.

Timmisartoq Kangerlussuarmi mittarfimmut 60 meterinik silissusilimmut utissanersoq imaluunniit Nuup tungaanut ingerlaannassanersoq timmisartumik ingerlatitsisup aalajangertariaqalerpaa.

Aallaqqaammut assakaasut pissusissamissut siaarsinnaanerat ingerlatitsisup silaannarmiitillutik misissorpaa. Sulilu pingaarnerusumik: parnaarlutik siaarsinnaanersut.

Taamaalisinnaariarmata assakaasut inissittarfiata matua ajoquseqqunagu tingitaaqqunagulu timmisartup kigaannerulluni illoqarfiit pingaarnersaata tungaanut ingerlatiinnarnissaa aquttup aalajangiuppaa.

Quiasaapilunneq
GL 555 pilersaarutit malillugit Kangerlussuarmit nal. 12.30 aallarpoq. Ingerlaarneq minutsinik 50-inik sivisussuseqartussatut naatsorsuunneqarpoq. Maannali aquttup ilisimatitsissutigaa tikinnissaq akunnerup affaata missaanik kinguaattuussasoq. Nalinginnaasumimmi ingerlaarnermi 270 knob sukkassuserineqartaraluartoq maanna 180 knobiinnarnut appartinneqarpoq.

Timmisartumi issimasut akornanniippoq Sermitsiaq.AG'p assiliisua tusagassiortualu. Ilaasut tamarmik eqqissisimanerat malugisinnaavarput, naak ilaatigut quiasaapiluttoqarpaluttaraluartoq.

SAS-ip "Crash 8"-mik ukiualuit matuma siorna Dash 8 Q400-nik pisaarisimasaanut arlalinnut ajornartorsiuterpassuaqarfigisaanillu atsiussamik SAS-ip ajornartorsiuteqarsimanera ilaasut ilaannit eqqaasitsissutigineqarpoq. Assakaasut pissutigerpiarlugit.

Air Greenlandilli timmisartua allaaneruvoq, assingusunik ajornartorsiuteqarsimanngitsoq.

Nuummut minnissaq minutsinik arfinilinnik sioqqullugu ilaasut aquttumit kingumut ilisimatinneqarput timmisartoq ajornartorsiutitaqanngitsumik missasoq. Kisiannili timmisartup mikkuni kalinneqarluni terminalimukaanneqarnissaa aamma ilisimatitsissutigalugu.

Ilaasut ilisimatinneqarput tamanna nalinginnaasumik periuserineqartartoq assakaasut ikkuffiit ajoquteqassagaluarpata arlaannik pisoqariataarsinnaanera eqqarsaatiginerullugu.

Tamatuma peqatigisaanik ilaasut apeqqutissaqarsinnaasut minnerup kingorna aquttunik oqaloqateqaqqullugit.

Periarfissaq tamanna Sermitsiaq.AG-mit atorneqarpoq.

Aquttoq akivoq
- Pisoq ilungersunartuua?

- Naamik. Ilaasut navianartorsiortinneqanngillat. Kisianni sungiusaatiginissaa aalajangiupparput, taamalu Nuummi mittarfimmi kikkut tamarmik piareersimanissaat iliuuseqarnermi aqutsisuusartumit isumagineqarluni, aquttoq, Niels Peter Lukassen, akivoq.

- Kangerlussuarmut uternissaq isumaliutigaasiuk?

- Kangerlussuarmut meqqusaanngilagut orsussaqarpallaaratta. Taamaattumik Nuup tungaanut ingerlaannarpugut.

- Assakaasut atunngikkalluarlugit mittoqarsinnaava?

- Aap. Ajornerpaassagaluarpoq assakaasup aappaa siaarpat parnaarlunilu. Pisumili matumani taammaattoqarnissaanik takussutissaqanngilaq.

- Biilit arlallit mittarfimmut avalassimanerat qatserisartullu piareersimagunarnerat ilaasunit takuneqarsinnaavoq?

- Immikkut upalungaarsimasoqarnissaa pisariaqanngikkaluarpoq, kisianni oqareernittut pisoq sungiusaatiginiarlugu aalajangerpugut, Niels Peter Lukassen akivoq.

Minnerup kingorna timmisartoq kalinneqarluni hangariliaanneqarpoq. Teknikkikkut ajoqut annikitsoq pineqarsimagunarpoq. Timmisartullu ullup ingerlanerani timmisartuusseqqilereernissaa aquttunit naatsorsuutigineqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER