Skip to main content

Puisit amii tunisaajartoqqilerput

Nunatsinniit puisit amii Kopenhagen Furs aprilimi kaattaasimmat ilaapput ammillu piujuartitsinermik avatangiisinullu illersuinermik tunngaveqartut sallaatsunnguamik tunisaajartoqqilerput 

Københavnimi Glostrupip kitaani Kopenhagen Fursip kaattaassiviani ulluni kingullerni nunarsuarmit tamarmiit amernik pisiniartut aatsaat taama amerlatigaat. 

Tallimanngornermiit marlunngornermut apriilimi amernik assigiinngitsunik kaattaassinermi amersiniat 750-it missaanniipput. Aaqqissuisut naatsorsuutigaat kaattaassinermi minkit amii 5 millioninit amerlanerusut tunineqassasut. 

Isumalluarnerit tunngavissaqarput, ukiuuneranimi ameerniarneq ingerlalluarsimavoq. Nunarsuaq tamaat eqqarsaatigalugu ukiuni makkunani amernik tuniniaaneq annerpaaffissaminiippoq. Nunarsuaq tamakkerlugu ameerniat kattuffiata International Fur Trade Federation, IFTF, kisitsisaataat nutaat naapertorlugit 2010-2011-mi ukiuunerani 83 milliardit koruunit nalinginut ameerniaroqarsimavoq. Ingammik Kangiani tuniniaavik annertuumik pisiniartalersimavoq.

Nunatsinniit puisit amii
Pisarneq malillugu Kopenhagen Fur aprilimi puisit amii aamma kaattaanneqarput, amernullu allanut naleqqiullugu tamanna annikinneruvoq.

Nunatsinniilli puisit amiinik tuniniaaneq sallaatsunnguamik siuariartorpoq, Great Greenland sapaatit akunnerata naanerani amernik kaattaassinermi peqataasoq amernillu 448-nik tunisaqartoq nalunaarpoq. Decembarimi amminik kaattaassisoqarmat puisip amia ataasinnguarluunniit tunineqanngilaq, februaarimi kaattaassinermi ammit 250-it tunineqalrutik.

Naak puisit amiinik tunisineq amminut allanut soorlu minkit amiinut allanullu amminut naleqqiullugit annikinnerungaaraluartoq taamaattoq kigaatsunnguamik siuariartortoqarpoq. 

Taama isumaqarpoq Great Greenlandimiit Lars Berg novembarimi 2011-mili nunatta ammeriviani pisortaalersimasoq. 

Tuniniaanermi periuseq nutaaq
Angut Jyllandip avannaamiu Qaqortumut Great Greenlandip qullersaqarfianut nuuppoq puisillu amiinik suliffeqarfiup ajornartorsiortup tuniniaanermi periusaa allanngortiterlugu aallartillugu. Maannakkut ammit tunisat tamarmik pingaaruteqarput. 

Puisi tunineqartoq ilisarineqarsinnaavorluunniit. Kopenhagen Furimi kaattaassinerup nalaani ammit 198-nik amerlanerusut tunineqarput februaarimi tunisanut naleqqiullugit, tamannalu ajunngilaq, Lars Berg Sermitsiaq.AG-mut oqarpoq.

- Ajunngilaq. Ineriartorneq taamaattoq ingerlaannartariaqarpoq, Lars Berg naatsumik oqarpoq.

Internetimi tuniniaaneq puisilu sumi pisaanersoq
Great Greenlandimut nutarterneqartumut pingaarutillit ilagaat nittartakkap pisoqalisoorsimasup nutarternissaa. Piffissami aggersumi Great Greenlandip nittartagaq nutartigaq saqqummiutissavaa, ilaatigut takuneqarsinnaassalluni nunatsinni amminik tunisassiat sumi pisiarineqarsinnaanersut. Kavaajat nioqqutissiallu normulersorneratigut tuugassaq toorlugu takuneqarsinnaassaaq puisi sumi pisaarineqarsimanersoq. 

- Pisisut takusinnaasariaqarpaat puisit amianik tunisassiaq suminngaaneernersoq. Ilisimassavaat  tunisassiat nunatsinneersut mingutsitsinngitsumik piujuartitsinerlu tunngavigalugit pisarineqarsimasut. Kavaajat tamarmik normulerneqassapput nunatsinnilu sumi pisaanerat takuneqarsinnaassalluni, Lars Berg nassuiaavoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER