KNR-p nutaarsiassaqartitsinera isornartorsiorpaa

- Siumup nunatsinni nutaarsiassalerinerup ingerlanneqarnera aarlerinartorujussuarmut inissisimasutut isumaqarfigaa, partiimi naalakkersuinikkut oqaaseqartartoq Per Berthelsen oqarpoq

Siumup naalakkersuinikkut oqaaseqartartua Per Berthelsen. Foto: Leiff Josefsen

- Maanna suut tamaasa ataatsimut kattullugit oqallisiginaveersaartariaqarpavut, taamatummi ataatsimooortitsineq oqallisigisamik ilisimasaqarnani oqallittarnerni atorneqakkajuttarmat.

Siumup naalakkersuinikkut oqaaseqartartua Per Berthelsen oqallissaarummini taama allappoq ilaatigu imaattunik "Siumup nunatsinni nutaarsiassalernerup ingerlarna aarlerigaa”.

- Taamaammat oqariartuut una KNR-imut sammitippara, taannami pisortanit sullissinissamik pisussaaffeqarnini pissutigalugu aningaasarpassuarnik pissarsisarmat, ilaatigut nutaarsiassanik siammarterinermut, innuttaasunut paasisitsiniaanermut, aliikkutassaqartitsinermut kiisalu tamanut soqutiginartunik aallakaatitassiornissamut pisussaaffeqarmat.

Pissutsit pingasut ullualunnguit ingerlaneranni pisut saqqummiutissavakka, tassungalu atatillugu sooq Siumumit nutaarsiassalerinermik ingerlatsinermut aarlerinitsinnik suna tunngavigalutigu erseqqissassallugu, Per Berthelsen allappoq.

KNR isornartorsiorpaa
- Pissutsit marluk Qanoruup ippassaq unnukkut aallakaatinneqarneraneersuupput. Nutaarsiassaq ataaseq kiisalu akileraarutip 1 procentimik appartinneqarnissaa pillugu nutaarsiassamik suliarinninnermut tunngasoq, tamannalu ilaatigut Aningaasaqarnermut Naalakkersuisoq aallakaatitsivimmeeqatigalugu ingerlanneqarpoq. Taanna piffissamik annertoorujussuarmik apeqqutinik suliamut apeqqusiisunik akornusersorneqarnani oqalunnissamut periarfissinneqarpoq, naak Siumut Radioavisimi Sermitsiamilu tunngavilersuutinik assingusunik erseqqissunillu, tamatuma qanoq ilusilerlugu inuiaqatigiinni kikkunnut tamanut iluaqutaasussanngorlugu oqaaseqarsimagaluartoq. Tamakku oqaatsimik ataatsimilluunniit Qanoruup aallakaatitsinerani eqqaaneqanngillat. Taamaallaat ilanngutassiat marluk SIK GAF-illu pilersaarutip tunngavianik isumaqataannginnermik imaqartut naatsut takutinneqarput, Per Berthelsen allappoq.

Læs også "A: Mellemindkomstgruppen bliver den store taber"

Læs også "IA: Skatteomlægning er kærkommen"

- Nutaarsiassaq alla partiimik nutaamik aallartitsiniarnermut tunngassuteqarpoq. Sooq taassuma pilersinniarneqarneranut tunngasumik oqaatsimik ataatsimilluunniit saqqummertoqanngilaq, aammalu kikkut pilersaarusiortuunersut taaneqarnani, naak tamanna Inuit Ataqatigiit tunngaviusumik eqqarsartaasiannut annertuumik innarliisoq ersarikkaluaqisoq, aammalu ”Aaqqissuisutoqarsuup” Sermitsiami ilanngussamini pissutsit suut taamatut suliniuteqalernermut tunngaviunersut erseqqissaavigigaluaraa.

Nutaarsiassaq qarsupinneqartoq
- Nutaarsiassaq kingulleq inuiaqatigiinni kikkunnilluunniit ilisimaneqanngilaq, taannami nunatsinni tusagassiorfiit arlaannaataluunniit suli eqqaanngilaa.

- Taanna tassaavoq Inatsisartut Aalisarnermut Piniarnermullu Ataatsimiititaliaanni ilaasortanit arfineq marluusunit pingasut paatsoorneqarsinnaanngitsumik Aalisarnermut Piniarnermullu Naalakkersuisup tunuarnissaanut kaammattuut, Naalakkersuisormi ”akisussaaffimminut atuunnerminullu tunngatillugu paasisimasaqanngilluinnarmat”, tamannalu nunatta avannaani aalisartorpassuit suli qaleralinniarnissamut akuersissummik tunineqarsimannginnerannik, taamaalillutillu isertitaqarsinaannginnerannik patsiseqarpoq, naak Aalisarnermut Naalakkersuisoqarfimmit ”kommunip allaffianut akuersissutinik aalliinnarsinnaasut” oqaatigineqaraluartoq. Nalunaarut taanna tusagassiuutini oqaatsimik ataasinnguamilluunniit aninneqanngilaq.

- Taava aperilaarlanga:

- Nunatsinni tusagassiorfiit, minnerunngitsumillu KNR nutaarsiassanik simittuisussanngorlugu pilersitaava, Siumummi isumaqaraluarmat taanna nutaarsiassanik aqqusaartuiffiusussaasoq. Taamatut pissusilersorneq politikikkut eqqortumik pissusilersorniarnermik issuaaniarnerua? Siumumimi isumaqarluinnarpugut pissutsit taamatut ineriartornerat sillimmarterfigisariaqaripput. Tamannami aarlerinaatilerujussuummat.

Innuttaasut namminneerlutik eqqarsaatersorsinnaapput, taamaammallu nutaarsiassat aqqutigalugit arlaannaannulluunniit attuumassuteqanngitsumik nammineerlutik inernilersinnaasaaminnik sassaallerfigineqarnissartik pisussaatitaaffigaat, Per Berthelsen allappoq.

Powered by Labrador CMS