Peqqinnissaqarfimmi qullersanik soraarsitsinerit
Radioaviisip paasisai malillugit pisortat angerlartinneqarsimasut pingasut ilaat marluk soraarsinneqarsimasut
Peqqinnissaqarfimmi aqutsisoqarfimmi pisortaq Kurt Nielsen peqqissaasuunerlu Lisbeth Lumby Rasmussen Radioaviisip paasisai malillugit nunami peqqinnissaqarfimmi aqutsisutut soraarsinneqarsimapput. Nakorsaaneq Carsten Thordal mianersoqqussummik tunineqarpoq.
Peqqinnissaqarfimmi qullersat sisamat ilaat pingasut marsip 25-ianni angerlartinneqarput, akissarsiat siumut tunniunneqartut, Kukkunersiuisoqarfiup ippinnartoqartitai, pissutigalugit.
Aamma atuaruk "Nakorsat siulittaasuat nassuiaaffigineqarpoq"
Aamma atuaruk "Peqqinnissaqarfimmi iliuuseqartoqarli"
Aaamma atuaruk "Sanami sulisut pissutsit kamaatigaat"
Akissarsiat siumut tunniunneqarsimasut siumoornerupput, tassa nunap immikkoortuini nakorsat, nakorsaanerit peqqissaasuunerillu akissarsiaasa qaffariaataat piffissap taamaasinerani suli naammassillugit isumaqatigiissutigineqarsimanngimmata.
Peqqissutsimut Naalakkersuisoqarfimmi pisortq Ann Birkekær Kjeldsen nassuiaasimavoq aningaasat tunniunneqartut pisortanut pineqartunut tunniunneqarsimanngitsut. Akerlianik aningaasat nunami nunap immikkoortuani nakorsat pisortaannut tallimanut, nakorsaanernut marlunnut peqqissaasuunernullu pingasunut tunniunneqarsimapput.
Ann Birkekær Kjeldsen sakkortuumik isorineqarpoq
Peqqissaasut Kattuffiata aamma Grønlands Lægekredsforeningip Anne Birkekær Kjeldsen suliassamik ingerlatsisimanera pillugu sakkortuumik isornartorsiorpaat.
- Suliassap taamatut suliarineqarnera kalaallit inuiaqatigiit imaluunniit kalaallit peqqinnissaqarfiata sulisuisalu atorsinnaanngilaat.
Taamatut apriilip sisamaanni ataatsimut tusagassiorfinnut nalunaarumminni allapput Peqqissaasut Kattuffiata siulittaasua Inuuti Fleischer aamma Grønlands Lægekredsforeningip siulittaasua Ole Lind