Kina Issittumi sunniuteqarnerorusuppoq
Island Sverigelu Kinap premierministerianit, Wen Jiabaomit, Issittumi Siunnersuisooqatigiinni alaatsinaatsutut inissisimalernissamik kissaarteqartumit, tikeraarneqalerput
Premierminister WenJiabaop Islandimut Sverigemullu tikeraarneranut atatillugu Kina issittumi sunniuteqarnerulerniarsariniarpoq.
Kina Issittumi Siunnersuisoqatigiinni alaatsinaatsutut inissisimalerusuttorujussuusoq Kinami politikeri nuimasoq ilisimatitsivoq.
Wen apriilip 20-aniit 27-anut Europami nunanut sisamanut tikeraarnerminut atatillugu nunanut taakkununnga marlunnut tikeraassaaq. Islandip Sverigellu saniatigut Tyskland Polenilu Kinami naalakkersuisut siulittaasuannit tikeraarneqassapput, nunanut allanut ministerip tullersortaa Song Tao tusagassiortunut ilisimatitsivoq.
- Issittumi eqqissinerup, patajaassutsip nungusaataanngitsumillu ineriartortitsinerup sulissutiginiarnissaanut nunanik attuumassuteqartunik, ilaatigut Islandimik Sverigemillu suleqateqalersinnaanerput neriuutigaarput, Song oqarpoq.
Kina Issittumi Siunnersuisoqatigiinni alaatsinaatsutut peqataasinnaalernissamut Sverigemit tapersersorneqareerpoq, oqarpoq.
Danmark nunarpullu akuersaakannersut
Kinap alaatsinaatsunngornissaanut Danmark nunarpullu aamma akuersaakannerput, Norgeli tunuarsimaarnerujussuulluni. Norgep aqutsinermut isornartorsiuisartumut Liu Xiaobomut Nobelip eqqissinermut nersornaasiuttagaanik nersornaasiinerata kingorna Norgep Kinamit attaveqarfigiumaanerunnerata kingorna Norgep Kinallu akornanni pissutsit suli aaqqinngillat.
Islandimut tikeraarnermini Wen illugiilluni attaveqaatinik qaninnerusunik, tassunga ilanngullugu nunap iluata kissaanik nukik arsarnerillu ilisimatusaatigineqarnerannik suleqatigiinnerup, pilersitsinissamut periarfissanik misissuiniarpoq.
Sverigemi suliffissuaqafiup nungusaataanngitsumik ineriartortitsinermik immikkut ingerlataqarfiusup pilersinnissaa pillugu isumaqatigiissummik atsioqatigiinnermut Wenip najuunnissaa naatsorsuutigineqarpoq, Song oqarpoq.
Issittumi Siunnersuisoqatigiit naalagaaffiit akornanni oqalittarfiuvoq, nunat issittumiittut ilaasortaasut arfineq-pingasut pingaartumik nungusaataanngitsumik ineriartortitsineq avatangiisinillu illersuineq pillugu suleqatigiinnissaannik pingaarnertut siunertaqartoq. Sverigep Islandillu saniatigut nunat ilaasortaasut tassaapput Danmark Kalaallit Nunaat Savalimmiullu peqatigalugit, Norge, Finland, Rusland, USA aamma Canada.
Nunarsuup kiatsikkiartornerata kinguneranik sikut aakkiartornerat nunarsuullu immikkoortortaani pisuussuterpassualimmi umiarsuarsuit imarpikkoortaatit sumiissusersiorsinnaaleriartortillugit Kina Issittumi nuimanerusumik sunniuteqalerusuttorujussuuvoq.
