Skip to main content

Inuuneq pineqarpoq

Imaatigut angalasartut angallatiminni eqqortunik atortorissaaruteqaraluarpata ujaasinerit annaassiniarnerilu amerlanersaat pinngitsoorneqarsinnaassagaluarput

Najugaqarfigisami sinerissallu qanittuani ujaasinerit annaassiniarnerillu annikinnerit kiisalu nunakkut ujaasinerit annaasiniarnerillu siulersornissaannuut Kalaallit Nunaanni Politiit akisussaasuupput.

Ujaasinerit annaassiniarnerillu siulersorneqarnerat pingasoqiusaasumik Kangilinnguani Sakkutooqarfiup (MRCC), Kangerlussuarmi Flyvecentralenip (ARCC) aamma Kalaallit Nunaanni Politiit akornanni agguarneqarsimavoq.

Politiit Nunatsinnilu Sakkutooqarfik marlunngormat ullaap tungaanipolitimestereqarfimmi tusagassiuutitigut katersortitsipput oqaluttuaralugu qanoq iliornikkut imaani ajornartorsiulerneq pinngitsoorneqarsinnaanesoq angallammik atortunik eqqortunik peqarnikkut.  

– Isumannaallisaaneq eqqarsaatigiuaannarsiuk. Aamma akeqanngitsortaa. Gummibåditaassaguit aappaluttumik allamilluunniit qalipaatilimmik pisinissaq immikkut akeqartanngilaq. Gummibådit qalipaatigissaarpat annaassiniarnermi oqartussat ajornannginnerujussuarmik nassaarisinnaassavaatsit. Angallatit nuannaariutit amerlanerpaartaat gummibådeqartarput, tamannalu ajunngilluinnarpoq, tassami gummibådimik pussinngasumik qaqutigorujussuaannaq nassaartarpugut. Angallat ikkarlippat immalerpallu gummibådimut ikinissaq suli piffissaqarfigineqassaaq taamalu nammineq ilaquttallu inuunerat annaallugit. Gummibådeqarnermi annaanneqarnissaq ilimanaatilerujussuusarpoq, politimester Bjørn Bay oqarpoq.

Siunnersuutitsialaat

Kisianni ikkarlikkaanni gummibådeqarneq kisimi pitsaasuunngilaq. Angalasup allanut attaveqaataasinnaasumik VHF-radioqarnissaa sumiinnermillu oqaluttuarsinnaasumik GPS-eqarnissaa aamma pingaartuuvoq. Annikitsualuilli allat aamma inuunermik annaassisinnaapput.

– Angallammi aamma oqortussamaateqartoqartassaaq. Angallammi ajornartoornermi taquassanik, tujuulussuarmik oqortumik, sialussiummik VHF-radiomillu imaluunniit GPS-imik angallattakkamik imalimmik puussiaateqarnissaq, pooqattaqarnissaq nammattagaqarnissarluunniit isumassarsiatsialaavoq. Ilaquttat gummibådimut annaannerisa saniatigut nammattagaq aamma ikineqassaaq. Ilaqutariit tamarmik ilisimassavaat arlaannik pisoqarpat nassarneqassasoq. Taava pisariaqarnerpaanik gummibådimiittoqassaaq. VHF radio GPS’ilu aamma nammattakkamiissapput. Angalaalinnginnermi tamatuma oqaloqatigiissutigisarnissaa sungiutiinnagassaavoq. Tassami inuunerput oqaluuseraarput. Ilaqutariinnut suut isumannaatsuunerat aallannginnersinni minutsialunni oqaloqatigiissutigisarsiuk, Bjørn Bay kaammattuivoq.

Kalaallit Nunaanni inuppassuit puttaqutinik annanniuteqartannginnerat ilisimaarineqarluarpoq, Bjørn Bayili inassuteqarpoq tamatigut puttaqummik annanniuteqartoqartassasoq, taanna puttatitsisinnaammat.

Ullumikkut puttaqutit annanniutit oqitsuararsuit atisimallugillu malunnaanngingajattut pissarsiarineqarsinnaapput. Annammiummik puttaquteqarnissaq isumassarsiatsialaavoq, taanna puttatitsisinnaammat. Nalunngilara imaq nillertorujussuusoq, imaanullu nillertumut nakkaraanni sukkasuumik toqusoqartaroq. Kisianni puttaquteqaraanni angumerineqarluni annaanneqartoqarsinnaavoq, imaassinnaavormi qanittumi annaassiniarnissamik umiatsiaqartoq. Puttaquteqarlunilu imaani toqussagaluaraanni taava imaani periarfeerutiinnarni nassaarineqartoqarsinnaavoq, Bjørn Bay oqarpoq.

Naammattumik ikummatissaqarnissaq

Angalanermi naammattumik orsussaqarnissap pingaartuunera politiinit Kangilinnguanilu Sakkutooqarfimmit aamma erseqqissaatigiumaneqarpoq.

–  Siorna inunnik orsussamik nunguutsisimasunik tallimariarluta arfinileriarlutaluunniit annaassiniartariaqarsimavugut. Angalalernermi naammattumik orsussaqarnerup qularnaarnissaa pingaarutilerujussuuvoq. Taamaanngippat pilersaarusiornerlunnerussaaq, Kangilinnguani Sakkutooqarfimmeersoq orlogskaptajn Michael Hjorth oqarpoq.

Vicepolitiinspektøri qanoq iliuuseqarnermullu aqutsisoq, Viggo Johansen, aamma erseqqissaalluni oqarpoq, angallatip aserfallatsaalinissaa pingaartuusoq.

–  Inuit angallatertik pitsaanngikkaluartoq aallartarnerat arlaleriarluta misigaarput. Tamanna aamma akisussaassuseqannginneruvoq. Angallat isumannaatsuunngitsoq nalunngikkaluarlugu aallarsimagaanni akiligassinneqartoqarsinnaavoq, tassami ujaasineq annaassiniarnerluunniit akisoorujussuusinnaasarmata. Taamaaliorsimagaannimi inuunermik navianartorsiulerneq nammineerluni pisuussutigineqartarpoq. Ujaasinermi ikiortissanik angallammik, qulimiguulimmik, qamuteralannik attartorneq inunnilluunniit ikiorteqarneq akisoorujussuuvoq. Tamanna politiinut aningaasartuuteqarnerussutaasarpoq, Viggo Johansen oqarpoq.

- Inuit sianiilliorsimagunik illersorneqarsinnaanngitsunillu iliuuseqarsimagunik akiligassinneqassapput. Sumiiffinni annertuuni ujaasineq aallartinniariartoq suna tamarmi akisunerulersarpoq. Aamma inuit salloqitaammik kalerrisaarisut aningaasartuutinut akiliisussanngortitaasarput, Bjørn Bay ilisimatitsivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER