Ilisimatusartoq: Tupinnaannartumik qanillattorpoq
Inuit misigisartik nuannaarutigiinnassavaat. Qaqutigoortorujussuuvoq kissaviarsummik taama qanillattortigineqartarneq, ilisimatusartoq oqarpoq
Ilisimatusartut pisortaat Lars Witting, Pinngortitaleriffik ippassaq kissaviarsummik qanillivissut ilagaat. Taaanna isumaqarpoq kissaviarsuk sapaatit akunneri arlallit Nuummiissimasoq.
- Taannarpiaasimassaaq issatsiaq takusara. Nalinginnaasumik timmiaq taama qanillineqartigisinnaaneq ajoraluarpoq, soorlu arfininngornermi Nuummi kaajallariap eqqaanisut. Tupinnaqaaq aqquserngup sinaani uninngaarmat. Naajarsuarmik nerinermi kingorna tiguartisimassaqaaq, ilami inuit isiginnaartut soqutigerpasinngilai, Lars oqarpoq.
Lars Witting naapertorlugu Nuummi kissaviarsuit marlussuit ukiut tamaasa ukiisarput. Nalinginnaasumik timmiaq takujuminaattarpoq.
- Piffissap annerpaartaani qaqqaniittarpoq. Timmigaangamilu takujuminaalluni sukkasoorujussuarmik timmeriaaseqarami, Lars Witting nassuiaavoq.
Taassuma takusani nuannaarutigaa.
- Kissaviarsummik isiginnaarneq alutornavippoq. Pingaartumik meterialuinnarnik ungasitsigalugu, Lars naggasiivoq.