Skip to main content

Partii inuiaat katersuuffissaat nutaaq

- Ilorpiatta Akisunnera – taama partii pilersinniarneqartoq nutaaq taaguteqassaaq, Nikku Olsen oqaluttuarpoq

- Danmarkimiit qalaseq kipigutsigu aatsaat uittutut pissaagut. Nunagisatsinni inuiattut isumaliortaaserput aallaavigalugu sulissaagut, inuiaassutsimulli paasinnittut ataqqinnittullu tamaasa tikilluaqquagut.

Ilorpiatta Nipaa taaguusiullugu nutaamik partiiliorniartoq, Nikku Olsen oqarpoq.

- Kalaallit Nunaat inuiaat kalaallit katersuuffigisinnaasaannik nutaamik pisariaqartitsivoq. Tamannalu piviusunngussappat inuiaassuseq inuiattullu naleqartitat aallaavigalugit  pilersinneqartariaqarpoq. 

Nikku Olsen ukiorpanngortuni Inuit Ataqatigiinnut ullumikkut nunatsinni partiit annersarisaannut ilaasortaasimavoq. Siorna oktobarimi partiimut ilaasortaajunnaarpoq.

Kalaallisut inuiaassuseq
Maanna partiimik nutaamik inuiaassutsimik pingaarnertut aallaavilimmik pilersitsinialeruttorpoq. Taanna isumaqarpoq Kalaallit Nunaanni politikkimi inatsisartoqarnermi nunagisamik pingaartitsineq kalaallillu naleqartitaannik pingaartitsineq amigaataalluinnartut.

- Maannakkut paasinarsivoq naalakkersuinikkut ingerlatsinermi inuiaat pingaarnerunatik, akerlianilli pissuussutsit uumaatsut pingaarnerutinneqaleriartuinnartut.

- Ukiuni makkunani inuiaat kinaassusaat matoorlugu aningaasanik sukkanerpaamik taarsersorlugit ingerlatsisoqarpoq, uangalu tamakkununnga qimoqataasinnaanngilanga, Nikku Olsen Sermitsiaq.AG-mut oqarpoq.

Naalagaaffik namminersortoq

Nikku Olsen isumaqarpoq inuiaat kalaallit nunagisaminnik pingaartitseqqilissappata inuiaassutsimik pingaartitsineq ukiut qulikkuutaat kingulliit marluk ingerlaneranni malunnaarunnaariartorsimasoq politikkikkut anguniakkani qaffasissumik inissisimasariaqartoq. Taamaattumik Kalaallit Nunaata inatsisitigut Danmarkip naalagaaffianut attaveqarnera nalilersorneqaqqittariaqarpoq, isumaqarpoq.

- Avaqqussinnaanngilarput nammineq naalagaaffinngortariaqaratta, tassami qallunaat tunngaviusumik inatsisaannit inuunerput mattunneqarsimavoq, tamannalu peqqutigalugu qallunaanit aqunneqarlutalu taakku isumaliortaasiannit inuusaaserput sunnerneqarsimavoq.

- Erseqqissaatigissavarali inuiaat qallunaat uani pineqanngimmata kisiannili inatsisit naalagaaffillu pineqarmata, Nikku Olsen oqarpoq. 

Nunanit allanit sunniivigineqarneq

Taanna isumaqarpoq inuiaat kalaallit nunaminnik ineriartortitsinissaminnut nunanit allanit sunnersimaneqarnerat killilersimaarneqartariaqartoq.

- Suleriaaserput suninnguagullu tamangajammik qallunaat inatsisiliaannik toqqammaveqartuartillugit inuiattut immitsinnut aallaavilernavianngilagut, Nikku Olsen oqarpoq.

Ingerlaqqilluni oqarpoq, ukiup ingerlanerani internetsikkut oqallittarfiit ilaai atorlugit isummaminik anitsisarsimalluni aammalu Nuummi pilersaarummut soqutiginnittunut malinnaasunullu matoqqasumik oqallitsitsillunilu isumasiuisarsimalluni – tamannalu soqutiginarluarsimasoq.

- Malunnarpoq innuttaasut ilaannit eqqarsartaaseq taamak ittoq, tassalu inuiaassutsimik pingaartitsineq aallavigalugu oqallinneq nunamillu ineriartortitseqataarusunneq, amigaatigineqarsimasoq.

Kommunalbestyrelsit Inatsisartullu

Pilersaarutit malillugit piffissami qaninnerusumi anguniakkap partiinngortinneqarnissaa siunertaralugu sinerissami innuttaasunik atsiortitsinissaq aallartinneqassasoq, aammalu politikkikkut anguniakkat piffissami aggersumi sukimiinerusumik saqqummiunneqarumaartut, Nikku Olsen oqarpoq. 

- Politikkikkut anguniakkagut piviusunngortinneqassappata soorunami kommunalbestyrelsinut aamma Inatsisartunut qinersinissanut tullernut qinigassanngortitsinissarput naatsorsuutigilluinnarparput. Soorunami tamanna atsiortitsinerit pisariaqartut 920-t piumasaqaataasut naammassisinnaajumaarnerivut apeqqutaassaaq, Nikku Olsen oqarpoq.

Partiip nutaap oktobarimi ataatsimeersuarnissaa Nikku Olsenip naatsorsuutigaa.

Inuit Ataqatigiit Nikku Olsenip partiiliorneranut tunngasunik oqaaseqarusunngillat.
 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER