Lyberth: Matusineq kanngunartuliaavoq

Siumumiit Karl Lyberth Maniitsumi ernisarsiup matunera pillugu isornartorsiueqqippoq. Aalajangiineq atorunnaarseqquaa

Qeqqata Kommuniani borgmsterip tullia siulleq Karl Lyberth Siumumeersoq.Foto: Siumut

Ippassaq peqqissutsimut naalakkersuisoq Agathe Fontain UA-meersoq kiisalu Qeqqata Peqqinnissaqarfiani nakorsaaneq Ove Rosing Olsen nassuiaapput sooq Maniitsumi Peqqissaavimmi ernisarfik maajip aallaqqaataani matusariaqarnersoq.

Ilaatigut erseqqissarpaat eriniarfiup matuniarnerani sipaarniarneq peqqutaanngitsoq, tassaanerullunili Maniitsumi nunaqarfiinilu naartusut siunissami Sisimiunut erniartortariaqalernissaanni anaanaasup naartuullu isumannaatsuunissaat.

Læs "- Sikkerheden for mor og barn er vigtigst"

Taamatulli nassuiaaneq Qeqqata Kommuniani borgmesterip tulliata siulliup Karl Lyberthip Siumumeersup naammageqqajanngilaa:

- Tamanna eqqunngilaq! Sisimiuni napparsimmavimmi nakorsat arlaannaalluunniit erninermi arlaannik immikkut pisoqartillugu passussinissamik immikkut ilinniarsimanngilllat. Allatut oqaatigalugu Maniitsumi nakorsaasartunit sanilliullutik suliassamut pineqartumut piginnaasaqarnerunngillat, Karl Lyberth tunngavilersuivoq.

- Sisimiormiut naartusut erninerminni isumannaannerusumiittussatut nalilikkat ikigisassaanngitsut Nuummut napparsimmavissuarmut aallartinneqartarput. Allaat imatut amerlatigalutik naartusunit Maniitsumiit Nuummukartinneqartartunit amerlanerullutik.

- Ove Rosing Olsenip Peqqinnissamullu Naalakkersuisup patsisilersuutitik ilumut ilumoorukkunikkit sooq Sisimiuni ernisarfik ilanngullugu matunngilaat ernisussallu tamaasa Nuummukartittalertillugit? Naartusummi isumannaatsumik ernisinnissaat eqqarsaatigalugu Maniitsumi Sisimiunilu napparsimmavinni pissutsit assigiilluinnarmata, Karl Lyberth oqarpoq.

Taanna naapertorlugu Maniitsumi juumuuerunnerata kingunerisaanik naartusut sorliit Nuummukartinneqassanersut nalilersuisussaarutissaaq.

- Tassa aamma imaassanerluni Maniitsormioq naartusoq Sisimiunukarteriarlugu nalilersorfigeriarlugu isumannaannerusumik erninissaa pillugu Nuummukartinneqartooq, Qeqqata Kommuniani borgmesterip tullia siulleq oqarpoq.

Læs "Karl Lyberth: En ommer, Ove Rosing Olsen"

Læs "Læge: Derfor lukker fødestuen"

Matusinissaq atorunnaarseqquaa
- Maniitsumi ernisarfiup matunissaa Maniitsormiunut, pingaartumik naartusunut ilaqutaannullu, amerlasuutigut nuanninngilluinnartumik kinguneqarnissaa kisiat eqqarsatigina, aammali Sisimiunukartinneqartalernissaat ataasiinnarmilluunniit iluaqutaanngilluinnarmat, kiisalu taamatut aalajangerneq napparsimmaveqarfinni eqqorneqartussani marluusuni, Maniitsumi Sisimiunilu, sulisunit tamanit naammagineqanngilluinnarmat, matumuuna piumasaraara aalajangerneq atorunnaartinneqassasoq piaarnerpaamillu Maniitsumi juumuussamik pissarsiortoqassasoq, Karl Lyberth oqarpoq.

Powered by Labrador CMS