Tartupaluup avinnissaa Inatsisartuni
Siumumiit Doris Jakobsenip qulakkeerusuppaa Danmarkip Canadallu Tartupaluup avinnissaanik isumaqatigiissutissaat piaartumik Inatsisartuni oqaluuserineqassasoq
Soorlu ullumikkut siusinnerusukkut uani nittartakkami allaaserigipput Canadamiut aviisiat National Post allappoq ukiorpassuarni Canadap Danmarkillu Tartupalummik killeqarfilerngusaanerat immaqa naammassilersoq.
Læs "Avis: Danmark og Canada vil dele Hans Ø"
- Soorunami nunat assigiinngitsut akornanni killeqarfinnut tunngasunik isumaqatigiinngissutaasut isumaqatigiinniarnertigut isumaqatigiinnermik aaqqinneqarsinnaagaangata tamatigut ajunngittaqaaq. Matumanili pineqartoq tassaavoq Danmarkip uagut sinnerluta nunatta, Kalaallit Nunaata ilaa pillugu piumasaqaammik taamaatitsiinarniarnera, Siumut sinnerlugu Folketingimi ilaasortaq Doris Jakobsen oqarpoq.
- Isumaqatigiissut Naalakkersuisuni suliarineqarsimanersoq naluara, uangali isumaqarpungaisumaqatigiissut taamaattoq isumaqatigiissutigineqarsinnaanngitsoq Naalakkersuisut isumaqatigiissummut akuersisimatinnagit. Namminersornerup anersaavaniittariaqarpoq nunanut allanut politikkimut isummanut tunngaviusunut attuumassuteqartut pillugit aalajangiinerit maannakkumiit Danmarkimut isumagisassanngortiinarneqartannginnissaat, qulakkeerneqartariaqarlunili tamanna aatsaat uagut nammineq naalakkersuisorisatsinniit tamakkiisumik akuerineqarneratigut pisinnaasassasoq, Doris Jakobsen DR-p radioavisianut oqarpoq.
- Taamaammat qulakkeerniarpara isumaqatigiissummut siunnersuut taanna piaarnerpaamik Inatsisartut nunanut allanut sillimaniarnermullu ataatsimiititaliaanni eqqartorneqassasoq.
Avitsinissaq suli Danmarkip Canadalluunniit isumaqatigiissutiginngilaat, National Post allappoq, pilersaarutit eqqornersut upparnersiniarsimagaluarlugu, iluatsinngitsumilli.